Саха сиригэр өрөспүүбүлүкэ бырабыыталыстыбатын отчуотун саайтын саҕалаатылар, онно оробуочай бөлөхтөр улуустарга сырыыларын кыраапыгын кытта билсиэххэ уонна 2025 сыллааҕы регион салалтатын кабинет сиһилии түмүгүн туһунан официальнай эппиэт ылыахха сөп. Ресурс бу сигэнэн баар.
Саха сирин баһылыга Айсен Николаев урут бырабыыталыстыба тус отчуотун суолтатын тоһоҕолоон бэлиэтээбитэ. Кини этэринэн, маннык тэрээһиннэр, ордук ыраах сытар нэһилиэктэргэ, өрөспүүбүлүкэ салалтатын кытта быһаччы кэпсэтэргэ ураты кыаҕы биэрэллэр.
«Олохтоохтортон, ону таһынан саамай ыраах сытар нэһилиэктэртэн элбэх ыҥырыы ыллым, ылабын. Үгүстэр бырабыыталыстыба салайааччыларыгар кыһалҕаларын кэпсиир, боппуруостарын биэрэр соҕотох кыахтара бу буолар. Итиэннэ дьоҥҥо-сэргэҕэ олус улахан суолталаах — тус кэпсэтии. Бырабыыталыстыба чилиэннэригэр ити эмиэ олус улахан суолталаах, тоҕо диэтэххэ, кинилэр дьону истэргэ, сөпкө истэргэ үөрэниэхтээхтэр», – диэтэ Айсен Николаев.
Кини этэринэн, маннык көрсүһүүлэргэ этиллибит дьон бэлиэтээһиннэрэ, этиилэрэ өрөспүүбүлүкэ бырабыыталыстыбатын билиҥҥи үлэтигэр учуоттаналлар. Саха сирин судаарыстыбаннай былааһын ситэриилээх органнарын отчуоттуур хампаанньата олунньу 2 күнүгэр саҕаланна. Түмүк «Саха» НКИХ телерадиовещание ханаалларыгар оҥоһуллуоҕа.
Санатан эттэххэ, Россия президенэ Владимир Путин былаас гражданнары кытта тиһигин быспакка алтыһыытын суолталаах диэн ааттаабыта. Судаарыстыба баһылыгын санаатынан, цифровизация дьону кытта тус сибээһи, көрсүһүүнү солбуйбат. «Гражданнар уонна былаас бэрэстэбиитэллэрин тус алтыһыылара – кинилэр икки ардыларыгар бэйэ-бэйэлэрин өйдөһүүлэрин, итэҕэллэрин үрдэтии тутаах фактора», — диэбитэ Владимир Путин.
