Бүлүү оройуонугар бэтэринээрдэр улахан иистэнэр иннэни ыйыстыбыт куосканы быыһаатылар. Туора эттик кыыл куртаҕар хаалбыт, диэн регионнааҕы ветеринария управлениета иһитиннэрэр.
«Хаһаайка үтүлүктэри абырахтыы олорон төлөпүөнүгэр аралдьыйар. Бу түгэҥҥэ тапталлаах куоската Кнопка иннэлээх сабы интэриэһиргээн, оонньуу олорон, алҕас ыйыстан кэбиһэр. Исписэлиистэр сытыы предмет кыыл куртаҕар, ис уорганнарыгар улахан хоромньуну оҥорбокко иҥнэн хаалбытын булаллар», — диэн Саха сирин ветеринариятын управлениетыгар иһитиннэрдилэр.
Эттиги таһаарар эпэрээссийэ ситиһиилээхтик барда. Маннык түбэлтэлэр бэтэринээрдэр практикаларыгар элбэх. Кыыллар ыйысталлар: иннэни, сабы, быаны, ас-үөл бүрүөһүнүн, уҥуоҕу, мишураны, манньыаты.
