Балаҕан ыйын 14 күнүгэр Дьокуускай куоракка “Московскай набережнайга” өрөспүүбүлүкэ киин куоратын төрүттээччитэ, воевода уонна сиринэн айанньыт Петр Бекетов пааматынньыгар сибэкки дьөрбөтүн ууруу сиэрэ-туома буолла. Тэрээһин Дьокуускай куорат 393 сылын бэлиэтииргэ ананна. Бу туһунан иһитиннэрэр www.sakha.gov.ru.
Саха сирин баһылыга Айсен Николаев Дьокуускай куорат мэрэ Евгений Григорьевы, Дьокуускай куорат Думатын бэрэссэдээтэлэ Альберт Семеновы, Российскай Федерация Геройдара Николай Соболевы уонна Филипп Евсеевы кытта монумеҥҥа сибэкки дьөрбөтүн уурда. Церемонияҕа өрөспүүбүлүкэ бырабыыталыстыбатын чилиэннэрэ, депутаттар, бэтэрээннэр, ыччат бэрэстэбиитэллэрэ уонна куорат олохтоохторо кытыннылар.
Церемонияҕа тыл этэригэр Айсен Николаев 1632 сыллаахха Петр Бекетов остуруок ууруутуттан Саха сирин киин куоратын летопиһа саҕаламмытын, бүгүн куорат Уһук Илиҥҥэ тэтимнээх киинигэр кубулуйбутун бэлиэтээтэ.
«Биһиги Дьокуускайбыт — былыргы куорат, дойду хотугулуу-илин өттүгэр саамай былыргы куорат, Сибиир уонна Уһук Илин биир кырдьаҕас куората. Мантан Уһук Илин уонна Аляска улахан сирдэрэ баһыламмыттара. Биллэн турар, Дьокуускай куорат инникигэ дьулуһууну мэлдьи көрдөрөр», — диэн өрөспүүбүлүкэ баһылыга тоһоҕолоон бэлиэтээтэ.
Кини Россия президенэ Владимир Путин Дьокуускай 400 сылын бэлиэтиир туһунан ыйаахха илии баттаабытын санатта.
«Биһиги президеммит Владимир Владимирович Путин бу даатаны бэлиэтиир туһунан ыйаахха илии баттаата. Куораппыт сылтан сыл кыраһыабай, тупсаҕай буоларын туһугар тугу барытын оҥоруохпут диэн эрэнэбин. Дьолу! Эйэни! Табыллыыны! Кыайыыны!», — диэтэ Айсен Николаев.
Куорат олохтоохторугар Дьокуускай куорат мэрэ Евгений Григорьев уонна Российскай Федерация Геройа Николай Соболев эҕэрдэ тыл эттилэр. Церемония бырагырааматыгар «Көмүс дорҕоон» оҕо ырыа кэлэктиибин музыкальнай көрдөрүүтэ киирдэ.
1632 сыллаахха енисейдааҕы казак сотнигын Петр Бекетов этэрээтэ Өлүөнэ өрүс кытылын бэрэбиэркэлээн, Ленскэй остуруогун уурбута. Бу сыл Саха Сирэ Россия судаарыстыбатын састаабыгар киирбит уонна кини киин куората – Дьокуускай куорат төрүттэммит күнүнэн ааҕыллар.
Россия президенин быһаарыытынан 2022 сылга Дьокуускай «Хорсун үлэ куората» диэн ааттанна. Бу аат куоракка 1941-1945 сс. Аҕа Дойду Улуу сэриитигэр Кыайыыны ситиһиигэ олохтоохтор улахан кылааттарын, маассабай дьоруойдуу үлэлэрин, дьаныардаах буолууларын иһин иҥэрилиннэ.
2025 сыллаахха Владимир Путин 2032 сылга Дьокуускай куорат төрүттэммитэ 400 сылын бэлиэтиир туһунан ыйаахха илии баттаабыта. Бу докумуон, эрдэ Саха сирин баһылыга Айсен Николаев бэлиэтээбитинэн, Саха сирин дьоно Россия судаарыстыбаннаһын үөскээһинигэр уонна сайдыытыгар историческай оруолун үрдүк сыаналааһын быһыытынан ылыммыттара.
