Квалификацияҕа Владимир Егоров утарсааччыта сэрэбиэй быһыытынан Индия бөҕөһө Аман Сехрават буолуохтаах этэ да, ыйааһыны ааспакка күрэхтэһииттэн уһуллубута. 1/8 финал түһүмэҕэр Егоров хас да сөкүүндэ иһигэр Ирактан Хусейн Альбехадилалборсы 10:0 ахсаанынан кыайда.
Салгыы финал чиэппэригэр Кыргызстан бэрэстэбиитэлэ Алмаз улу Бекзат мэһэйдээтэ, кини финалга киирдэ. Онон Егоров уоскутар көрсүһүүгэ кыттар кыахтанна.
Амматтан төрүттээх тустуук аныгыскы утарсааччыта канадец Гаретт Сондерс буолла. Кинини Владимир Егоров 53 сөкүүндэҕэ 10:0 ахсаанынан кыайда.
Аан дойду чемпионатын боруонсатыгар киирсиигэ саха бөҕөһүн кытта Узбекистантан Олимпийскай оонньуулар призердара Гуломжон Абдуллаев тахсар. Хапсыһыы тыҥааһыннаахтык барар, иккиэннэригэр сэрэтии бэриллэр. Оттон көрсүһүү бүтүөр диэри мүнүүтэ иннинэ Абдуллаев кыайыыны аҕалынар (3:1). Егоров аан дойду чемпионатыгар 57 киилэҕэ биэс күүстээх ахсааҥҥа киирдэ.
