Саха сиригэр народнай депутаттар уонна бырабыыталыстыба чилиэннэрэ кэлэр үс сылга — 2026-с сыллартан 2028 сылга диэри регионнааҕы бюджеты оҥороллор. Сөбүлэһиннэрэр хамыыһыйаларга уларытыылары дьүүллэһэллэр уонна сэтинньи 26 күнүгэр буолар бюджет иккис ааҕыытыгар сөптөөх быһаарыылары ылыныахтара. Саха сирин үбүн миниистирин эбээһинэһин толорооччу Иван Алексеев кэпсээбитинэн, дотация кээмэйэ улааппыт эрээри, ол эрээри олорор дьиэ-коммунальнай хаһаайыстыба эйгэтигэр 2026 сылга субсидия тиийбэт.
«Биһиги федеральнай үп министиэристибэтин кытта эһиилги ороскуоппут төрүөтүнэн улахан үлэни ыыппыппыт. Иккис ааҕыыга дотация суумата 29 млрд солк.кэриҥэ эбиллибитэ. Саха сирин курдук улахан субъект, бастакы ааҕыы быһаарыытынан, элбэх дотацияны ылыахтааҕын дакаастаатыбыт. Өрөспүүбүлүкэ баһылыга Айсен Николаев уонна Госдума депутата Галина Данчикова тус бэйэлэрэ кыттыбыттара», — диэн кэпсээтэ Иван Алексеев.
«Кэлэр үс сылга нолуок киириитэ эмиэ уларыйар. Онон бюджет эбии ороскуотун уопсай кээмэйэ 23 млрд солк. улаатар, олортон сороҕо дьиэ-уот коммунальнай хаһаайыстыбатын субсидиялааһыҥҥа ыытыллыаҕа. ОДЬКХ экономическай өттүнэн олохтообут толору тарыыбынан өрөспүүбүлүкэ нэһилиэнньэтэ төлөөбөтүн туһугар бу субсидия бэриллэр. Өҥө иһин Дьокуускай олохтоохторо 70%, Арктика оройуоннара 5-6% төлүүллэр. Субсидия суоҕа буоллар, хотугу сир олохтоохторо ыйга 120 тыһыынча солкуобайы төлүө этилэр», — диэн минфин салайааччыта тоһоҕолоон бэлиэтээтэ.
Миниистир иһитиннэрбитинэн, 2022 сылга бюджет 25 млрд солк.субсидияны төлөөбүт буоллаҕына, быйыл – 35 млрд солк., оттон кэлэр сылга 43 млрд солк. ууруллар.
«Бюджет ороскуотугар түөрт сыл иһигэр икки төгүл үрдээбит атын туох да ыстатыйа суох. Итинник үүнүү уматык сыаната, кредит ресурсата, үлэ төлөбүрүн пуондата ыараабытынан төрүөттэнэр — ону барытын ырытыахпыт. Субсидия үрдээһинэ өрөспүүбүлүкэ бюджетын атын ороскуоттарыгар сабыдыаллыырын өйдүөхтээхпит, тоҕо диэтэххэ, дохуот, хомойуох иһин, маннык тэтиминэн улааппат.
Дэписиит быйыл эрэ буолбакка, сылын аайы, кэнники түөрт-биэс сылга мунньуллан, улахан суумаҕа тиийдэ. Үксүгэр тохсунньу уонна олунньу ыйдарбыт намыһах дохуоттаах ыйдар буолаллар, тоҕо диэтэххэ, нолуок киириитэ суоҕун кэриэтэ. Урут тохсунньу 1 күнүгэр бюджеккэ улахан суума хаалбытынан киэн туттарбыт, холобур, 2024 сыл саҕаланыытыгар 23 млрд солкуобай, оттон быйыл — 707 мөл.солкуобай.
Балаһыанньа балачча уустук — ону кистиир сатаммат. Онуоха бырабыыталыстыба үлэлиир, дьаһал комплексын ылыахха наада, тоҕо диэтэххэ, биһиги 2026 сылга уурар 43 млрд солк. тиийбэт. Сыыппаралар ОДЬКХ-ҕа 82 млрд солк. көрүллүөхтээҕин дакаастыыллар. Оннук буолар түгэнигэр атын ороскуоту кыччатыахтаахпыт. Уопсайынан, кэлэр сылга бюджет 340 млрд солк. тэҥнэһэр», — диэн Алексеев быһаарда.
