Суол үлэһиттэрэ «Умнас» регионнааҕы суол 46-с — 51-с килэмиэтирин учаастагын өрөмүөнүн түмүктүүр түһүмэҕэр киирдилэр. Трасса саҥардыыта «Инфраструктура для жизни» национальнай бырайыак чэрчитинэн барар. Бу туһунан Саха сирин массыына суолун управлениета иһитиннэрэр.
Суол үлэтэ тэтимнээхтик ыытыллар. Бэдэрээтчит тымныы регенерация ньыматынан суол олоҕун оңорон, аспаал-бетон сабыыны икки араҥаҕа ууран, суол кытыытын кумах булкааһынынан бөҕөргөтөн, ону тэҥэ уу ааһар турбатын уларытта.
Эбийиэккэ 3,48 км хахха, 113 суол бэлиэтэ уонна 109 сэрэтэр остуолба саҥардыллыаҕа.
«РИК Автодор» АК бэдэрээтчит тэрилтэтэ эбийиэги балаҕан ыйыгар үлэҕэ киллэрэр былааннаах. Суол саҥардыллан өрөспүүбүлүкэ олохтоохторо «Орто Дойду» туркомплекска табыгастаах куттала суох айанныахтара.
Бэлиэтээн эттэххэ, былырыын суол үлэһиттэрэ 42-с км-тан 46-с км-га диэри учаастагы нуормаҕа киллэрдилэр. Суол учаастагын өрөмүөннээһин «Куттала суох хаачыстыбалаах суоллар» национальнай бырайыагынан барда.
