«2017 сыллаахтан табаһыттар съездтэрэ ыытыла илик. Онон, төһө да ыарахаттар баалларын үрдүнэн, быйыл табаны иитэр оройуоттар кыттыылаах киэҥ ыҥырыылаах дьаһалы ыытарга былааннаабыппыт. Култуура уонна спорт хайысхаларынан тэрээһиннэрдээх. Сайсары күөлгэ сылдьыбыппар элбэх табаһыт кэлэн, махтаммыта, кинилэргэ маннык дьаһал ыытыллара олус суолталааҕын эппиттэрэ. Табаһыттар чэпчэкитэ суох идэлээх дьон, кинилэр күүстээх үлэлэрин түмүгэр таба ахсаана, бытааннык да буоллар, эбиллэр», — диэтэ Айсен Николаев.
Өрөспүүбүлүкэ салайааччыта эппитинэн, табаһыттары кытта көрсүһүүгэ кинилэр сайыҥҥы кэмҥэ оҕолору ыстаадаларга көтөр аалынан тиэйиигэ-таһыыга үбүлээһин, адьырҕа кыыл элбээбитин, идэһэлиир пууннары тутуу, бородууксуйаны оҥорон харайыы уонна да атын боппуруостар тула кэпсэттилэр.
«Быйылгы бюджекка таба иитиитин өйөөһүҥҥэ 1,35 млрд солк көрүлүннэ, бу былырыыҥҥыга тэҥнээтэххэ, 20% элбэх. Бюджет төһө да ыарахатардааҕын иһин, биһиги быһаардыбыт. Таба төбөтүгэр субсидия индексацияланна уонна да атын хайысхаларга. Ааспыт сыллардааҕы өйөбүл баара бүгүҥҥү түмүккэ үчүгэйдик көрдөрдө. Салгыы үлэлиибит. Соруктар элбэхтэр, бары тэҥҥэ быһаарыахпыт», — диэтэ Ил Дархан.
Саха сиригэр таба иитиитигэр тыһыынчаттан тахса киһи үлэлиир. Ол иһигэр 900 табаһыт уонна 100 чуумсук, 185 көс ыал баар. 2020 сылтан таба ахсаана 6,5% эбилиннэ уонна 2025 сыл саҥатыгар 162 тыһыынча төбө буолла.
Саха сирэ табатын ахсаанынан Российскай Федерация субъектарыгар үһүс миэстэҕэ сылдьар.
