Саха сирин тыатын хаһаайыстыбатын уонна ас-үөл бэлиитикэтин министиэристибэтэ үбү-харчыны кулун тутар 13 күнүгэр диэри ыытыаҕа. Ол туһунан олунньу 25 күнүгэр Ил Түмэн XVII пленарнай мунньаҕар биэдэмистибэ салайааччыта Артем Александров иһитиннэрдэ.
«Быйылгы сылга ылыллыбыт бюджет дефицитин учуоттаан, үбүлээһин кээмэйин эбэргэ быһаарылынна. Саха сирин баһылыга Айсен Николаев 65 тыһыынча туонна үүтү бэлэмниир соругу туруорда. Субсидия ылааччыларга үп барыта кулун тутар 13 күнүгэр диэри толору тиэрдиллиэҕэ. Бары ыҥырыылары учуоттаан, быйылгы сылга туруктаах таһымҥа тахсыахпыт дии саныыбыт», — диэн Артем Александров бэлиэтээтэ.
Маны таһынан миниистир аграрнай салааҕа былырыыҥҥы сыллааҕы судаарыстыбаннай бырагыраамалар үлэлэрин түмүктэрин уонна олоххо киириилэрин туһунан кэпсээтэ. Кини салааны өйүүр судаарыстыбаннай боломуочуйаны биэрии кэнниттэн, тыа хаһаайыстыбатын уонна ас-үөл куттала суох буолуутун сайыннарыыга муниципальнай оройуоннар үлэлэрин үрдүктүк сыаналаата.
Саха сирин парламенын тыа сиригэр уонна аграрнай бэлиитикэҕэ кэмитиэт бэрэссэдээтэлэ Александр Атласов бэлиэтээбитинэн, быйылгы сылга бюджекка тыа хаһаайыстыбатын салаатыгар 13,5 млрд солк.көрүллүбүт.
