Оҕунан ытыы өрөспүүбүлүкэҕэ саҕаламмыта 60 сылыгар анаммыт күрэхтэһиигэ 283 спортсмен 25 улуустан кытынна.
«Оҕунан ытыы Саха сиригэр саамай сайда турар спорт көрүҥэ. Бу көрүҥү СВО бэтэрээннэрэ эмиэ сөбүлээтибит. Профессиональнай таһымҥа дьарыктанааччылар бааллар. Үчүгэй көрдөрүүлэрдээхтэр. Барыгытыгар махтал, тренербэр Алексеев Михаил Валерьевичка», — диэтэ Игорь Марсунов.
Кини кэпсииринэн, ох саанан ытыыга интэриэс оҕунан ытыыга РФ спордун үтүөлээх маастара, Паралимпийскай оонньууларга икки төгүллээх боруонса призер, Европа уонна Россия, аан дойду чөмпүйүөнэ Степанида Артахинова маастар-кылааһыгар сылдьан баран үөскээбит.
Игорь Марсунов элбэх ситиһиилээх. Ааспыт сайын Саха сирин сүүмэрдэммит састаабыгар киирэн, Уһук Илиҥҥэ Аҕа дойдуну көмүскээччилэр Кубоктарыгар боруонса призер буолбута, Россия таһымыгар финалга биэс бастыҥ иһигэр киирбитэ.
Күрэхтэһиини «Защитники Отечества» пуонда тэрийдэ.
