Хаҥалас улууһун 2-с Дьөппөнүгэр бырааттыы Николаевтар ааттарынан оскуолаҕа атырдьах ыйын 25 күнүгэр агротехнологическай кылаас арылынна. Үөрэнээччилэр ыаммытынан үүттэн хайдах үрүҥ ас оҥорон таһаарары көрдөрдүлэр. Ол туһунан регион салалтатын пресс-сулууспата суруйда.
Саҥа кылаас сыл саҕаланыыта, дойду президенэ Владимир Путин көҕүлээбит “Технологическое обеспечение продовольственной безопасности” национальнай бырайыагын чэрчитинэн, «Кадры в АПК» регионнааҕы бырайыагынан тэрилиннэ.
Инвесторынан «Совхоз 50 лет Октября» ТХПК бэрэссэдээтэлэ Тихон Скрябин буолла. Үөрэх хайысхатынан биотехнология уонна үрүҥ аһы оҥорон таһаарыы талылынна, онон кылаас бу хайысханан оборудованиенан хааччылынна. Оҕолор биологияны, химияны, физиканы уонна математиканы дириҥник үөрэтиэхтэрэ.
«Тыа хаһаайыстыбата — Саха сиригэр биир саамай улахан суолталаах салаа, онон оҕолор тыа хаһаайыстыбата ис өттүттэн хайдах үлэлиирин билэллэригэр, идэҕэ уһуйуллалларыгар анаан, оскуолаттан саҕалаан АПК тэрилтэлэригэр үлэлиэхтээх кадрдары бэлэмниибит. Оскуолаларга тыа хаһаайыстыбатын тэрилтэлэрин исписэлиистэрэ кэлэн лекциялары ааҕыахтара уонна оҕолору экскурсияҕа ыҥырыахтара. Оҕону кыра сааһыттан тыа хаһаайыстыбатын салаатыгар үөрэтиигэ кыттар бөдөҥ хаһаайыстыбалар баалларыттан олус үөрэбин», — диэн бэлиэтээтэ Саха сирин тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова.
«Кадры в АПК» регионнааҕы бырайыагы олоххо киллэрии чэрчитинэн 2025 сыл бүтүөр диэри И.Е. Федосеев-Доосо аатынан Дириҥ орто агрооскуолатыгар уонна Советскай Союз Геройа Ф.К. Попов аатынан Баатара оскуолатыгар агротехнологическай кылаастар аһыллыахтара.
