Саха сиригэр ынах сүөһүгэ, сылгыга кыстык кэмэ бигэ туруктаахтык ааһар. Өрөспүүбүлүкэ тыатын хаһаайыстыбатын министиэристибэтэ иһитиннэрэринэн, кыстык бүтүөр диэри 82 күн хаалар, онуоха хаһаайыстыбалар наадалаах аһылыгынан толору хааччыллаллар.
Муниципальнай тэриллиилэр дааннайдарынан, билигин сүөһү аһа баар: 200 300 туонна от (уопсай кээмэйтэн 46,5%), 14 300 туонна сиилэс (46,6%) уонна 4900 туонна сенаж (33,7%) буолаллар.
Өрөспүүбүлүкэ аграрийдара кыһын сиэтэргэ барыта 458 939 туонна сүөһү аһылыгын бэлэмнээбиттэрэ. Бу кээмэйгэ 413 438 туонна от, 30 718 туонна сиилэс уонна 14 783 тонна сенаж киирэллэр.
Бары категориялаах хаһаайыстыбаларга сүөһү ахсаана 151 600 төбөттөн тахса, олортон ыанар ынах — 63 400-тэн тахса. Билиҥҥи кэмҥэ 8000-тан тахса ынах төрөөбүт.
Сылгы ахсаана 164 200-тэн тахса төбө, ол иһигэр 112 600-тэн тахса биэ. Эбии аһылыкка 37 800-тэн тахса сылгы туруорулунна.
Санатан эттэххэ, дойду агропромышленнай комплексын иннигэр улахан соруктар тураллар: Россия президенэ Владимир Путин 2030 сылга АПК бородууксуйатын оҥорон таһаарыы кээмэйин 25% — тан итэҕэһэ суох, 2021 сыл таһымынан тэҥнээтэххэ, улаатыннарарга сорудахтаата. Саха сиригэр Ил Дархан Айсен Николаев «Олохтоох оҥорон таһаарыыны уонна туризмы сайыннарыы туһунан» стратегическай ыйааҕынан 2030 сылга олохтоох оҥорон таһаарыы кээмэйин 1,5 төгүл улаатыннарарга сыал-сорук туруорулунна. Онуоха эти оҥорууну билиҥҥи 39 000 туоннаттан 59 000 туоннаҕа диэри, оттон валовой үүтү 248 000 туоннаҕа диэри улаатыннарыахтаах, онуоха үүтү бэлэмнээһин кээмэйэ 65 000 туоннаттан 132 000 туоннаҕа диэри үрдүөхтээх.
