Субуотаҕа, тохсунньу 17 күнүгэр, Дьокуускай куорат А.Е. Кулаковскай аатынан норуоттар доҕордоһууларын дьиэтигэр « Триумф традиций, ценностей, единения» бэлиэнэн Россия норуоттарын сомоҕолоһууларын сылын үөрүүлээх аһыллыыта буолла. Тэрээһин чэрчитинэн норуоттар икки ардыларынааҕы сыһыан эйгэтигэр бастыҥ бырайыактар бэлиэтэннилэр, диэн суруйда ЯСИА.
Кыттааччыларга туһаайан, Саха сирин норуоттарын тас сибээстэригэр уонна дьыалаларыгар миниистирэ Гаврил Кириллин кэлэр сыл ураты суолталааҕын тоһоҕолоон бэлиэтээтэ.
«Бу событие биһиги улуу дойдубутугар олорор бары норуоттар сомоҕолоһууларын уонна бэйэ-бэйэлэрин өйдөһүүлэрин бэлиэтэ буолар, ону тэҥэ үйэлээх култуура үгэстэр баай нэһилиэстибэлэригэр харыстабыллаахтык сыһыаннаһарын тоһоҕолоон бэлиэтиир аналлаах. Биһиги өрөспүүбүлүкэбит норуоттарын култуураларын сайдыытыгар, үгэс буолбут духуобунай сиэр -майгы сыаннастарбытын харыстааһыҥҥа, элбэтиигэ, уопсастыбабытыгар эйэни, сөбүлэҥи харыстааһыҥҥа туһуланар элбэх араас тэрээһиннэри, элбэх бырайыактары тэрийиэхтээхпит, ыытыахтаахпыт», — диэтэ Гаврил Кириллин.
Миниистир эппитинэн, кылаабынай сорук — тэрээһиннэри эрэ ыытарга буолбакка, култуура биир санааланыытын, бэйэ-бэйэни убаастаһыытын, бэйэ-бэйэни байытыһыытын идеяларын олох бары эйгэтигэр дириҥник киллэрии, хас биирдии киһи сүрэҕэр хардары-таары ылыныы буолар.
“Биһиги бары бииргэ норуоттар икки ардыларынааҕы эйэни уонна историябытын харыстааһыҥҥа сүҥкэн кылааты киллэрэрбитигэр бигэ эрэллээхпин”, — диэн түмүктээтэ.
Саха сирин чукчаларын Ассоциациятын бэрэссэдээтэлэ Жанна Дьячкова хотугу сир аҕыйах ахсааннаах норуоттарын тылларын харыстааһын үлэтин түмүгүн туһунан кэпсээтэ уонна кэлэр сылга былааннарын үллэһиннэ.
“Бүгүн биһиги “Төрөөбүт тыллары харыстааһын” номинацияҕа наҕараада туттубут, «Сохраним. Приумножим. Будем говорить» кэмпириэнсийэни тэрийии иһин ыллыбыт. Былырыын хотугу сир төрүт олохтоох аҕыйах ахсааннаах норуоттарын ыччаттарыгар анаан ыыппыппыт. Бу төрөөбүт тылларбытын, үгэстэрбитин харыстыыр, сайыннарар үлэбит сэҥээриини, өйөбүлү буларын бигэргэтэр», — диэн Жанна Дьячкова бэлиэтээтэ.
Кини этэринэн, Саха сирэ культурнай уонна национальнай эгэлгэтинэн аатырар.
«Быйыл муус устар ыйга, Арктика улуустарын көхтөөх ыччатын түмэр регионнар икки ардыларынааҕы хотугулуу-илиҥҥи форуму ыытары былаанныыбыт. Ыаллыы сытар улуустарга – Аллараа Халыма, Орто Халыма, Үөһээ Дьааҥы, Усуйаана оройуоннарыгар уонна Аллайыахаҕа ыҥырыы ыыппыппыт. Биһиги сыалбыт — ыччат, кинилэр биһиги кэскилбит, ол кэскилбит эрэллээх илиигэ буоларын баҕарабыт», — диэн тоһоҕолоон бэлиэтээтэ өрөспүүбүлкэ чукчаларын Ассоциациятын бэрэссэдээтэлэ.
Саха сиригэр Россия норуоттарын сомоҕолоһууларын сылын арыйыы өрөспүүбүлүкэ норуоттар икки ардыларынааҕы сөбүлэһиини бөҕөргөтүүгэ уонна баай култуура нэһилиэстибэтин харыстыырга дьулуһуутун бэлиэтиир чаҕылхай событие буолла.
Хаартыскалары манна көр.
