Сайыҥҥы навигацияҕа былаан Саха сиригэр 47,9% туолла. Бу туһунан гражданскай оборуона дьыалаларыгар уонна регион нэһилиэнньэтин олоҕун-дьаһаҕын куттала суох буолуутун хааччыйыыга министиэристибэ иһитиннэрэр.
Былааннаммыт 1 148 733,3 туоннаттан бүгүҥҥү күҥҥэ 550 737,6 туонна тиэрдилиннэ. Тиэйии хаамыытын навигация суһал бөлөҕүн мунньаҕар дьүүллэстилэр. Мунньаҕы миниистир солбуйааччыта Никита Павлов ыытта.
Тэрилтэлэргэ техниканы өрөмүөннээһини түргэтэтэргэ, логистиканы тупсарарга, ону тэҥэ үбүлээһин боппуруостарын быһаарарга сорудах бэрилиннэ.
Быһаарыы туолуутунан сотору кэминэн өссө биир мунньах былааннанар.
