Саха сиригэр оттук сезона саҕаланыаҕыттан чааһынай мас баанньыктарга баһаар буолара элбээтэ. Ол туһунан өрөспүүбүлүкэ баһаартан сэрэхтээх буолууга судаарыстыбаннай сулууспата иһитиннэрдэ.
Быһылаан үксүн өрөбүллэргэ уонна бырааһынньык күннэргэ буолар. Баһаарынайдар уот биричиинэтинэн оһох аһары итийээһинин ааттыыллар. Сороҕор хаһаайыттар оһоҕу көрүүтэ суох хаалларар түбэлтэлэрэ эмиэ баар.
Ол курдук, алтынньы 22 күнүгэр түүн Хатас нэһилиэгин баһаарынай чааһыгар Урожнай уулусса 17/2 аадырыска баһаар буолбутун туһунан диэн иһитиннэрии киирбит. Баһаарынайдар кэлэллэрин саҕана баанньыктан хойуу буруо тахса турбут. Хата быыһыыр сулууспа тута кэлэн, уоту атын тутууга көһүөн иннинэ тохтоттулар. Быһылаан түмүгэр ким да эмсэҕэлээбэтэ. Баһаар тахсыбыт биричиинэтэ, хоромньу уонна буруйдаах чуолкайданар.
