Дьокуускайга норуоттар икки ардыларынааҕы кырдьаҕастар күннэригэр аналлаах «Саха сирэ көхтөөх уһун үйэлэнии иһин!» өрөспүүбүлүкэтээҕи пуорум саҕаланна. Икки хонукка барыахтаах тэрээһин былаас уорганнарын, муниципальнай тэриллиилэр уонна уопсастыбаннай тэрилтэлэр 200-чэкэ бэрэстэбиитэллэрин түмэр.
Өрөспүүбүлүкэҕэ 191 тыһыынча аҕа саастаах көлүөнэ дьоно олорор. Пуорумҥа кинилэри өйүүр дьаһаллары дьүүллэһии буолла.
“Саастаах дьоҥҥо сөптөөх усулуобуйаны тэрийии, көхтөөх, доруобай уонна хаачыстыбалаах уһун үйэни хааччыйыы судаарыстыбаннай социальнай бэлиитикэҕэ приоритетнай сорук буолар», – диэн бэлиэтээтэ Саха сирин үлэҕэ уонна социальнай сайдыыга миниистири солбуйааччы Иннокентий Коротких.
Кини эппитинэн, Саха Сиригэр кырдьаҕас дьоҥҥо анаммыт 27 социальнай өйөбүл дьаһала баар, бырагыраамалары өйүүргэ 100-тэн тахса мөл солк көрүллэр. Биир саҥа көҕүлээһининэн үлэлээбэт биэнсийлээхтэргэ көрүллэр социальнай хантараак буолар, кинилэргэ 500 тыһ солк диэри биир кэмнээх төлөбүр оҥоһуллар, кэтэх хаһаайыстыба тэринэригэр предпринимательствонан дьарыктанарыгар.
Төгүрүк остуол уонна семинардар кэмнэригэр экспертэр, ол иһигэр «Старость в радость» пуонда уонна РАНХуоГС бэрэстэбиитэллэр кыттыылаах уһун үйэлэнии туһунан уонна кырдьаҕас киһини бостуктааһын систиэмэтин сайыннарыыга үлэлиэхтэрэ.
Сарсын, балаҕан ыйын 26 күнүгэр, пуорум үлэтэ Ю.А. Гагарин аатынан култуура киинигэр салҕанан барыаҕа. Куорат олохтоохторугар бырааһынньыктааҕы уонна сырдатар тэрээһиннэр киэптэринэн ыытыллыаҕа. Ыалдьыттары киэҥ бырагыраама күүтэр: социальнай өҥө быыстапката, доруобуйаҕа уонна үбү туттууга исписэлиистэр консультациялара, айар маастар-кылаастар уонна чэбдигирии дьарыктара. Күн үөрүүлээх кэнсиэринэн түмүктэниэҕэ.
