«Волонтеры Победы» Россиятааҕы уопсастыбаннай хамсааһын Саха сиринээҕи салаатын толорооччу дириэктэрэ Тимур Егоров бэлиэтээбитинэн, Аҕа дойду улуу сэриитигэр Кыайыы 80, Россияҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар Кыайыы волонтердарын үлэтэ өссө күүһүрэр.
«Кыайыы волонтердарын үөрэтэр бырагыраама үс түһүмэхтэн турар. Бастакыга волонтер миссиятын кытта билиһиннэрии. Манна Аҕа дойду улуу сэриитин уонна аныгы Россия историялара кэпсэнэр, волонтер инструментарийдарын кытта билсэллэр», — диэтэ Тимур Егоров.
Иккис түһүмэх кулун тутарга барар. Хайысхаларынан чопчулаан үөрэтиллэр. Волонтер үлэтигэр наадалаах компетенция сайдыытыгар сыаллаах-соруктаах ыытыллар.
Үһүс — муус устарга, «Волонтеры Победы» өрөспүүбүлүкэтээҕи пуорум буолуоҕа, манна Саха сирин улуустарыттан 200-тэн тахса кыттааччы мустуоҕа.
