Саха сиригэр бырааттыылар Кыһыл кинигэҕэ киирбит хатыыһы сокуоннайа суох бултааһыҥҥа уорбаланаллар. Кинилэргэ 8 сылга диэри хаайыы уонна улахан ыстараап түбэһиэн сөп.
Уһук Илиҥҥэ Россия ИДЬМ УТ пресс-сулууспата иһитиннэрбитинэн, Нам оройуонугар транспортнай полицейскайдар Өлүөнэ өрүскэ патрульга сылдьан, сокуоннайа суох балыктыыр икки эр киһини туттулар.
Мотуордаах оҥочону 78 саастаах олохтоох киһи ыытар. Кинини кытта 74 саастаах быраата сылдьыбыт. Оҥочоҕо полицейскайдар Российскай Федерация Кыһыл кинигэтигэр киирбит 15 сибиир хатыыһын буллулар. Биэнсийэлээхтэргэ РФ УК 258.1 ыстатыйатын 3 чааһыгар холуобунай дьыала тэрилиннэ.
Уорбаланааччыларга икки мөлүйүөн солкуобайга тиийэ ыстараап уонна аҕыс сылга диэри хаайыы тиксиэн сөп.
Тырааныспары уонна бултуур тэрили полицейскайдар ыллылар. Сокуоннайа суох бултаммыт балык барыта төттөрү ууга ыытылынна.
