Саха сирин баһылыга Айсен Николаев РФ газомоторнай уматык ырыынагын 2035 сылга диэри өрөспүүбүлүкэҕэ сайыннарыы концепциятын олоххо киллэриигэ сүбэ мунньаҕы ыытта. Мунньах кэмигэр тырааныспар гаас уматыкка түргэнник көһөрүгэр наадалаах сүрүн хайысхалары уонна дьаһаллары көрдүлэр, диэн иһитиннэрэр sakha.gov.ru.
«Дойдуга гаас уматыгы туһанар тырааныспар ахсаанын эмискэ элбэтиигэ, аныгы заправкалыыр сервиснай инфраструктураны тэрийиигэ туһулааһын ылылынна, ол, биллэн турар, экологическай быһыы-майгы тупсарыгар тиэрдэр. Бу үлэҕэ, мин санаабар, биһиги өрөспүүбүлүкэбит туох да түгэҥҥэ туора туруо суохтаах», — диэтэ Саха сирин баһылыга.
Николаев кэнники сылларга газ уматык ырыынагын сайыннарыыга киэҥ дьаһаллар ылыллыбыттарын санатта. Холобур, техниканы гааска көһөрүүгэ субсидия көрүллэр, гаас заправкалыыр ыстаансыйалар ситимнэрэ кэҥиир, нолуок чэпчэтиилэрэ киллэриллибиттэр. Судаарыстыба массыыналары уларытыы сыанатын 90% — гар диэри толуйар.
Маны сэргэ мунньахха Дьокуускайга гаас уматыкка ыарахан уйуктаах техниканы көһөрөр лабораторияны тэрийии боппуруоһа көрүлүннэ. Кини куорат автопааркатын саҥардыыны түргэтэтэргэ кыах биэриэн сөп.
Ону таһынан СПГ-га тырааныспары көһөрөн баран, гаражтарга, ангарга куттал суох буолуутун кытаанах ирдэбиллэрэ олохтонор. Онон сүбэ мунньах кыттыылаахтара муниципалитеттары уонна тэрилтэлэри өйүүр биир кэлим бырагырааманы оҥорорго этии киллэрдилэр, ол иһигэр вентиляция систиэмэлэрин саҥардыы уонна датчиктары туруоруу ороскуотун субсидиялааһын.
Айсен Николаев тыа хаһаайыстыбатын техникатын СПГ-га көһөрүү кэлим бырайыагар ураты болҕомтону ууран, олоххо киллэриини толору өйөөтө. Саха сирин баһылыга бырамыысыланнас уонна тыа хаһаайыстыбатын министиэристибэлэригэр наадалаах быһаарыылары бииргэ үлэлэтэргэ сорудахтаата.
