Сэтинньи 13 күнүгэр, Саха сиригэр инновация күнүгэр, «Воздушная переправа» бырайыак иккис түһүмэҕин — Дьокуускай уонна Аллараа Бэстээх икки ардыгар дроннар көмөлөрүнэн таһаҕаһы тиэрдиини саҕалаатылар.
От ыйын ортотуттан атырдьах ыйын 10 күнүгэр диэри ыытыллыбыт бастакы түһүмэх кэмигэр дроннар Өлүөнэ өрүс нөҥүө 600 кг таһаҕаһы ситиһиилээхтик тириэртилэр. Оператордар күҥҥэ уонча рейскэ диэри толороллор. Биир тэрил 10 киилэҕэ диэри таһаҕаһы илдьэ барыан сөп, оттон биир рейс бириэмэтэ 15 мүнүүтэ буолар.
Бырайыак иккис түһүмэҕэ тырааныспар сырыытыгар биир саамай уустук кэмҥэ — муус кэмигэр -30 кыраадыс температураҕа ыытыллыаҕа.
«Дроннары туһаныы сезон быыһыгар нэһилиэнньэлээх пууннар икки ардыларыгар тохтоло суох сибээһи хааччыйарга дьиҥнээх быһаарыы буолуоҕа. Ити логистическай ороскуоту лаппа кыччатыаҕа, ол иһигэр таһаҕаһы тиэрдии бириэмэтин 2-3 төгүл аҕыйатыыны уонна атын маршруттары кытта тэҥнээтэххэ сыаната чэпчэки», — диэн вице-премьер Анатолий Семенов бэлиэтээтэ.
Сүрүн тэрийээччилэринэн «Якутия» технопарк, нефтегазовай салаа логистическай оператора уонна «Бунтар» ИТ-хампаанньа буолаллар. Саха сирэ нэһилиэнньэлээх пууннар икки ардыларыгар БПЛА утумнаах рейстэрин тэрийбит бастакы регион буолла.
«Воздушная переправа» аныгы технология олохпутун хайдах уларытар кыахтааҕын чаҕылхайдык көрдөрөр. Биһиги бырайыакпыт логистика эйгэтигэр саҥа кыахтары арыйан, дьоҥҥо-сэргэҕэ, бизнескэ туһаны оҥорор, бүтүн өрөспүүбүлүкэ сайдыытыгар көмөлөһөр сыаллаах», — диэн бырабыыталыстыба бэрэссэдээтэлин солбуйааччы Анатолий Семенов эбэн биэрдэ.
