«Бултуу, балыктыы, оттуу, отон уонна тэллэй хомуйа, сынньана тахсыбыттар, туристар, ону сэргэ быһалыы суолунан барааччылар муналлар. Тыыннаахтыы булбут дьоммут кэпсииллэринэн, кинилэр айманан хаалаллар, атах балай сүүрэллэр, тугу да булан аһыы сатаабаттар. Хонор буоллахтарына, окко эбэтэр үүтээннэри булан утуйаллар, кутаа уот отто сатыыллар», – диэтэ Валерий Андросов.
Сирин билбэттэр
Билбэт сиргэ киһи түргэнник мунар. Ол иһин тыаҕа тахсыах иннинэ тиийиэхтээх ойуургутун каартаҕа көрөн үөрэтиэхтээххит. Холобура, трассатын, уот ситимин, гаас турбатын, күөл, үрэх хайдах сыталларын. Бу ориентирдар мунар кэмҥитигэр олус көмөлөөх буолуохтара.
Айылҕа көстүүтэ
Ойуурга сылдьар кэмҥитигэр халлаан эмискэ былытынан бүрүллүөн, ардах, хаар түһүөн, хараҥарыан сөп. Тулаҥ биллибэт буола уларыйа түһэр. Онон мунуохха сөп. Ойуурга барыах иннинэ күн-дьыл туругун билсиэххэ наада уонна уларыйыы тахса илигинэ ойуур иһиттэн тахсыллар эбэтэр олох да атын күҥҥэ барыыны-кэлиини уларытыллар.
Доруобуйа туруга
Итирик дьон мунар, ыалдьар дьон, ол иһигэр психическай ыарыылаахтар уонна ойуурга эчэйии ылбыттар. «Ханнык баҕарар түгэҥҥэ балаһыанньаны сыаналыы үөрэниэххэ наада, туох баҕарар буолуон сөп», – диир быыһааччы.
