Ил Дархан Айсен Николаев Таатта улууһун Ытык Күөл сэлиэнньэтигэр өрөспүүбүлүкэ тыатын хаһаайыстыбатын сайыннарыы боппуруостарыгар мунньахтаата. Тыа хаһаайыстыбатын оҥорон таһаарыыны өйүүр саҥа ньымаларын киллэрии уонна быйылгы оттооһун хампаанньатыгар бэлэмнэнии боппуруостарын көрдүлэр, диэн НВК Саха телеграм-ханаала суруйар.
Айсен Николаев муниципальнай таһымҥа кэҥэтиллибит боломуочуйалар суолталарын тоһоҕолоото уонна тыа хаһаайыстыбатын бородууксуйатын кээмэйин улаатыннарар үлэни салгыы ыытарга ыҥырда.
«От үлэтэ саҕаланна, сыл саамай күүрүүлээх кэминэн буолар. Бу дьыл тыа хаһаайыстыбатын үлэһиттэрэ 435 тыһыынчаттан тахса туонна оту, 13 тыһыынчаттан тахса туонна сенаһы уонна 24 тыһыынча туонна сиилэһи бэлэмниэхтээхтэр. Өрөспүүбүлүкэ ситиһиитэ куруук дьон үлэтигэр олоҕурар. Бу от үлэтэ барыта былааннаахтык толоруллуоҕа диэн эрэнэбин», – диэн Айсен Николаев бэлиэтээтэ.
