Дьокуускайга «НомНом Квест» мобильнай сыһыарыыны тэрийэр бырайыак олоххо киириитэ саҕаланна. Сервис маҕаһыыннарга аахсыйалар уонна чэпчэтиилэр тустарынан информацияны хомуйуоҕа, ырытыаҕа уонна туһанааччыларга персональнай сүүмэрдээһиннэри талларыаҕа. Онуоха искусственнай интеллект туһаныахтара. Ол туһунан РФ Минвостокразвития пресс-сулууспата иһитиннэрэр.
Бырайыагы «НомНом Квест» хампаанньа «Квартал труда» креативнай кластерга Уһук Илин уонна Арктика Сайдыытын Корпорациятын (КРДВ) өйөбүлүнэн ыытар. Сыһыарыы классическай агрегатор буолбатах диэн этиллэр, бэйэтэ архитектуралаах, алгоритмнардаах уонна API-лээх бырагыраама буолар.
2026 сыл үһүс кыбаарталыгар старт буолара былааннанар. «НомНом Квест» хампаанньа бырайыакка бэйэтин харчытын уурар. Бастаан сыһыарыы Саха сиригэр үлэлиэ, онтон Уһук Илин атын регионнарыгар эмиэ баар буолуоҕа.
КРДВ социальнай сайдыыга ситэриилээх дириэктэрэ Гасан Гасанбалаев этэринэн, Саха сирэ бүгүн дойдуга ИТ-бырайыактар уонна креатив экономика эйгэтигэр цифровой быһаарыылар сайдалларыгар биир тутаах регионунан буолар.
«НомНом Квест» дириэктэрэ Кирилл Мын-Чин-Лин өрөспүүбүлүкэҕэ ритейл цифровой быһаарыыларыгар ирдэбил уонна ону тэрийэргэ, сайыннарарга усулуобуйа баарын бэлиэтиир.
Көҕүлээччилэр былааннарынан, 2028 сылга Саха сириттэн уонна Уһук Илин атын регионнарыттан 800-чэ маҕаһыын уонна партнердар сервискэ холбоноллор.
