Саха сирин экологияҕа министиэристибэтэ 2025 сылга 558 эһэни бултуурга 316 көҥүл биэрдэ. Итинник быһаарыыны нэһилиэктэр баһылыктарыттан, сир баайын туһанааччы хампаанньалартан уонна олохтоох дьонтон адьырҕа кыыл кутталы үөскэтэрин туһунан иһитиннэриилэр кэннилэриттэн ылылынна, диэн биэдэмистибэ суруйда.
Бүгүҥҥү күҥҥэ 144 эһэ бултанна. Кыыл ахсаанын бэрээдэктииргэ туһуламмыт булт сезона 30 күн барыаҕа. Ытыыга көҥүл босхо бэриллэр.
Биэдэмистибэ отон хомуйар кэмҥэ, эһэни кытта көрсүһэр түгэн баар буолуон сөбүнэн, бэйэни көмүскэнэр сириэстибэни илдьэ сылдьар наадалааҕын туһунан санатта. Олорго перцовай спрейдар, фальшфейердар уонна тыас-уус тэриллэрэ киирэллэр. Ону тэҥэ бэйэни көмүскээһиҥҥэ саа туттуохха сөп, ол гынан баран булт сезонун болдьоҕор уонна анал көҥүл баар буоллаҕына эрэ.
Нэһилиэнньэлээх пууннар аттыларыгар эһэ баарын биллэххэ 112 нүөмэргэ эбэтэр министиэристибэ территориальнай салааларыгар — инспекцияларыгар уонна судаарыстыбаннай экологическай кэтээн көрөр кэмитиэттэргэ тута биллэриэххэ наада.
