Саха сирин ходуһаларыттан 365 356 туонна от хомулунна. Оттон бааһыналартан, тэпилииссэлэртэн 23 500 туонна хортуоппуй уонна 3 500 туонна оҕуруот аһа хомулунна. Хомуур салҕанар.
Быйыл бас билии көрүҥүттэн тутулуга суох бары хаһаайыстыбаларга, өрөспүүбүлүкэ үрдүнэн 29 796 туонна оҕуруот аһын хомуйар сорук турар. Сайын устатыгар тэпилииссэлэртэн 799 туонна оҕуруот аһа хомуллубута. Оттон аһаҕас буорга үүннэриллэр оҕуруот аһын ыллахха, балаҕан ыйын 15 күнүнээҕи туругунан, 23 500 туонна хортуоппуй уонна 3 500 туонна оҕуруот аһа хомулунна. Бу бүтэһиктээх сыыппара буолбатах, билигин хомуур үгэнэ.
Балаҕан ыйын 15 күнүнээҕи туругунан, өрөспүүбүлүкэ үрдүнэн 365 356 туонна от чөкөтүллэн, сыл тахсар от 80 %-а хааччылынна. Маны таһынан 18 274 т сиилэс (былаан 68 %), 7 065 т сенаж (былаан 48 %) бэлэмнэннэ. Мобильнай биригээдэлэр 30 тыһ. т. оттооннор, сорудахтарын 76 % толордулар. Биирдиилээн улуустарынан ыллахха, былааннарын Абый (151 %), Бүлүү (100 %), Уус Маайа (97 %), Үөһээ Бүлүү (96 %), Дьокуускай куорат (97 %) толордулар. Тыа хаһаайыстыбатын министиэристибэтэ мобильнай биригээдэлэри тэрийиигэ 33,752 мөл. солк көрөн, уон икки улууска 25,6 тыһ. т от оттонно, аны 12,2 тыһ. т оттуурга алта улууска 16,3 мөл солк эбии көрүллүөхтээх. Амур уобалаһыттан 17 535 туонна, Магадан уобалаһыттан 1 050 туонна оту атыылаһарга кэпсэтии ыытыллар.
Бу туһунан Тыа хаһаайыстыбатын министиэристибэтин сиртэн үүнээйини ылыыга, мелиорацияҕа уонна материальнай-тэхэньиичэскэй хааччыйыыга департаменын салайааччы Вячеслав Гаврильев иһитиннэрдэ.
Раиса Сибирякова, «Саха сирэ», edersaas.ru
