Саха сирин култууратын уонна духуобунай сайдыытын министиэристибэтэ 2026 сылга «Земскэй култуура үлэһитэ» бырагыраамаҕа кыттарга сайаапканы ылыы саҕаланарын туһунан биллэрдэ. Биэдэмистибэҕэ бырагыраама тыа сирин нэһилиэнньэлээх пууннарыгар уонна кыра куораттарга үлэлииргэ култуура эйгэтин исписэлиистэрин ылыыга туһуламмытын бэлиэтээтилэр.
2026 сылга 27 култуура үлэһитигэр биир кэмнээх компенсация төлөбүрүн биэрэр былааннаахтар. Төлөбүр кээмэйэ 2 мөлүйүөн солкуобай.
«Биир булгуччулаах усулуобуйанан, үлэ дуогабарыгар сөп түбэһиннэрэн, сүрүн үлэлиир сиригэр биэс сылтан итэҕэһэ суох исписэлиис буоларга эбэһээтэлистибэни ылыы буолар. Биир кэмнээх компенсацияны төлөөһүн туһааннаах дуогабар түһэрсиллибит күнүттэн уон халандаарынай күн устата ыытыллар», — диэн регион култууратын министиэристибэтигэр кэпсээтилэр.
«Земский работник культуры» бырагыраамаҕа кыттарга сайаапкалары ылыы тохсунньу 12 күнүттэн муус устар 15 күнүгэр диэри ыытыллыаҕа. Муус устар 16 күнүттэн ыам ыйын 15 күнүгэр диэри куонкурус хамыыһыйата сайаапкалары көрүүнү уонна сыаналааһыны, ону тэҥэ талыы кыайыылаахтарыгар биллэриилэри ыытыыны былааннанар. От ыйын 20 күнүгэр диэри кыайыылаахтар испииһэктэрин бигэргэтии туһунан быраап актата тахсыаҕа, атырдьах ыйын 10 күнүгэр диэри култуура тэрилтэлэрин кытта үлэ дуогабарын түһэрсии, оттон атырдьах ыйын 25 күнүгэр диэри биир кэмнээх компенсация төлөбүрүн биэрэр туһунан дуогабарга илии баттааһын көрүллүөхтээх.
Судаарыстыбаннай Мунньахха (Ил Түмэн) сылын ахсын ыытыллар туһаайыыга Саха сирин баһылыга Айсен Николаев өрөспүүбүлүкэҕэ 2026 сылы Култуура Сылынан биллэрбитэ, элбэх национальнай омук культурнай идентичноһын бөҕөргөтүү суолтатын уонна уопсастыба биир санааланыытын үөскэтиигэ ускуустуба оруолун тоһоҕолоон бэлиэтээбитэ. Кини этэринэн, аныгы усулуобуйаҕа искусство дьон өйүгэр-санаатыгар сабыдыала күүһүрэригэр, көрүҥүнэн аныгылыы, тыынынан күүстээх, ис хоһоонунан түмсүүлээх айымньылары айар ордук суолталаах.
