2025 сылга Саха Сиригэр 10 680 субуотунньук ыытылынна, онно 214 998 киһи кытынна. Ол туһунан нэһилиэнньэлээх пууннары санитарнай ырааһырдыы хамыыһыйатыгар эттилэр. Тэрээһини өрөспүүбүлүкэ вице-премьерэ Ольга Балабкина ыытта. Бу туһунан www.sakha.gov.ru сайт иһитиннэрэр.
Урукку кэмнэри кытта тэҥнээн көрдөххө, 2024 сылга 6 952 субуотунньук ыытыллыбыт, онно 123 957 киһи кыттыбыт. Онон субуотунньуктар ахсааннара 35% — тан тахса үрдээтэ, ону ааһан гражданнар кыттыылара 70% — нан элбээтэ.
Субуотунньуктар чэрчилэринэн 2025 сылга 9 079 мас уонна 21 647 талах, (2024 с – 5 891 мас уонна 5 609 талах) олордубуттар. Икки төгүл элбэх көҥүлэ сыбаалка сабылынна – 1 080 (2024 с — 492). 3 338 контейнер былаһаакката (2024 с — 1 611) нуорма туругар киллэрилиннэ.
Субуотунньуктары тэрийиигэ лидер-оройуоннар ортолоругар Амма, Таатта, Чурапчы, Эдьигээн, Усуйаана, Өймөкөөн ааттаннылар.
Ольга Балабкина «Күөх чэппиэр» экологическай аахсыйа үтүө холобурун бэлиэтээтэ. Ол чэрчитинэн барыта 167 тэрээһин 7 403 олохтоох кыттыылаах ыытылынна.
Бу аахсыйа маассабай субуотунньуктары ыытыыга эрэ буолбакка, нэһилиэнньэ ортотугар туруктаах экологическай үгэстэри үөскэтиигэ эмиэ туһуланар.
““Күөх чэппиэр” – сири-уоту хомуйууттан таһынан, экологическай өйдөөх быһыыны-майгыны иитии, уопсай экологическай культураны иҥэрии көдьүүстээх инструмена буолар. Бу күн пиар аахсыйалары ыытыахха, пластиканы туһаныыттан аккаастаныахха, үлэҕэ массыынанан буолбакка, сатыы эбэтэр бэлэсипиэтинэн тиийиэххэ, углекиснай гаһы таһаарыыны кыччатыахха сөп. Муниципальнай тэриллиилэр баһылыктара «Күөх чэппиэрдэр» олоххо киириилэрин тус хонтуруолларыгар туталлара олус улахан суолталаах. Бу бырайыак Саха сирин баһылыга Айсен Николаев судаарыстыбаннай салайыы туһунан ыйааҕын олоххо киллэрии чэрчитинэн үөскээбитэ», – диэтэ Ольга Балабкина.
“Күөх чэппиэр» аахсыйа дойду президенэ Владимир Путин көҕүлээһининэн олоххо киирэр «Экологическай чэгиэн буолуу» национальнай бырайыак уонна өрөспүүбүлүкэ баһылыга Айсен Николаев «Саха Өрөспүүбүлүкэтин экологическай чэгиэн-чэбдик буолуутун туһунан» стратегическай ыйааҕын сыалын-соругун, соруктарын толорор.
Маны сэргэ мунньахха Роспотребнадзор Саха сиринээҕи Управлениетын салайааччытын солбуйааччы Наталья Борисова нэһилиэнньэлээх пууннар санитарнай туруктарын туһунан дакылаатын уонна Саха сирин баһылыгын иһинэн архитектура уонна куорат тутуутун Управлениетын салайааччытын солбуйааччы Василий Федоров нэһилиэнньэлээх пууннары тупсарыы туһунан дакылаатын истэн быһаарыылары ылыннылар.
