Узбекистан туризмҥа кэмитиэтин бэрэссэдээтэлин солбуйааччыта Джамшид Абдусаламов эппитинэн, туризм сектора кинилэр дойдуларыгар национальнай экономика биир стратегическай суолталаах хайысхата буолар.
«Ааспыт сылга омук туристара, биһиги өрөспүүбүлүкэбитигэр сылдьыбыттар, ахсааннара 10,2 мөл киһи, онтон 850 тыһыынчата — Российскай Федерация гражданнара. Быйыл Россияттан мөлүйүөнтэн тахса киһи кэлэрин күүтэбит. Россия куораттарын кытта авиасибээс нэдиэлэҕэ 280 рейс. Маннык тэрээһиннэр кэннилэриттэн быһа маршрут баар буоларыгар эрэллээхпин», — диэтэ Джамшид Абдусаламов.
Саха сирин бырабыыталыстыбатын бэрэссэдээтэлин солбуйааччыта Анатолий Семенов эппитинэн, Узбекистаны кытта сибээс туризмынан эрэ муҥурдаммат. «Бастатан туран, атыыны таска таһаарыы эйгэтэ. Биһиэхэ, биллэн турар, сайдыыга барыы баар. Биһиги ааспыт сыллааҕы эргиирбит бу хайысхаҕа икки мөлүйүөн дуоллар, уонна салгыы улаатар», — диэтэ кини.
Ордук болҕомто үөрэх эйгэтигэр бииргэ үлэлээһиҥҥэ уурулунна. «Хотугулуу-илин федеральнай университекка 22 устудьуон Узбекистаантан үөрэнэр. Кинилэр үөрэнэллэрэ босхо. Биһиги бу хайысхабытын кэҥэтэн биэрихпитин наада. Биһиги бэйэбит устудьуоннарбытын Узбекистааҥҥа ыытыахпытын сөп», — диэтэ Анатолий Семенов.
Культурнай бииргэ алтыһыы норуоттар ардыларынааҕы сибээскэ улахан оруоллаах. «Хас да тыйаатыр гастроллаата. Биһиги кэлэктииптэрбит Узбекистааҥҥа элбэхтик сылдьыахтарын баҕарабыт. Холобур, Саха сирин күннэрэ Узбекистааҥҥа ыытылынныннар, биһиги көрдөрөрбүт уонна кэпсиирбит элбэх. Биһиги креативнай индустрия хайысхатыгар, ол иһигэр киинэҕэ уонна анимацияҕа бииргэ үлэлиэхпитин сөп», — диэн эбэн эттэ салайааччы.
Санаттахха, ааспыт сыл балаҕан ыйыгар Саха сирин баһылыга Айсен Николаев Юсуп Кабулжановы кытта V хотугу пуорумҥа тирэхтээхтик сайдыы туһунан кэпсэтиигэ кыттыбыттара. Онно өрүттэр бииигэ үлэлииргэ дуогабардаспыттара.
