Саха сирэ 2025 сыл бастакы аҥарын түмүгүнэн Уһук Илиҥҥи федеральнай уокурук регионнарын ортолоругар олорор дьиэни киллэрии кээмэйинэн үһүс миэстэни ылар. Тохсунньуттан от ыйыгар диэри региоҥҥа 415,8 тыһ.кв. м. дьиэ киирдэ.
«Олорор дьиэни үлэҕэ киллэрии өрөспүүбүлүкэ тутуу комплексын биир сүрүн хайысхатынан хаалар. Уһук Илиҥҥэ үһүс миэстэҕэ тахсыы, бу хайысхаҕа олоххо киирэр соруктар далааһыннарын көрдөрөр», — диэн Саха сирин экономикатын миниистирэ Петр Попов бэлиэтээтэ.
Бастакы ырыынакка бэс ыйыгар квадратнай миэтэрэ орто сыаната 178,5 тыһ. солк. тэҥнэстэ, бу ааспыт сыл таһымыттан 4,7% намыһах. Иккис ырыынакка — 133,7 тыһ.солк., бу былырыыҥҥы көрдөрүүттэн 7,0% үрдүк.
Тутуу эйгэтигэр үлэ уопсай кээмэйэ 163,7 млрд солк. тэҥнэстэ, ити былырыыҥҥы таһымҥа 88,8% сөп түбэһэр. Өрөспүүбүлүкэ бу көрдөрүүгэ Уһук Илиҥҥэ 2 миэстэни ылла.
