Саха сирин бюджетыгар федеральнай дотация 2026 сылга 28,9 миллиард солк. улаатыаҕа. Бу туһунан өрөспүүбүлүкэ үбүн миниистирин эбээһинэһин толорооччу Иван Алексеев «Саха сирэ 24» телеханаалга ыытыллыбыт «Актуальнай интервью» биэриитигэр иккис ааҕыыга бюджет параметрдарын кэпсииригэр эттэ.
«Иккис ааҕыыга бюджет параметрдара улаатыннарыы диэки уларыйда. Бастакы ааҕыыга федеральнай бюджеттан дотация, субвенция, субсидия, бюджет икки ардыларынааҕы трансферт ситэри түҥэтиллибэтэхтэрэ. Билигин хартыынабыт баар, иккис ааҕыыга бэлэммит. Билигин федеральнай бюджеттан ылар дотациябыт кээмэйэ 28 млрд 900 мөл. солк. улаатыа диир кыахтаахпыт», — диэтэ Иван Алексеев.
Итини тэҥэ Саха сирин үбүн министиэристибэтин салайааччыта федеральнай киини кытта эрдэттэн үлэлээһин түмүгүнэн итинник түмүгү ситиһэр кыахтаммытын бэлиэтээтэ. Алексеев өрөспүүбүлүкэ баһылыга Айсен Николаев уонна Госдуума депутата Галина Данчикова үлэлэрин тоһоҕолоон бэлиэтээтэ. «Дотация кээмэйэ улаатарын методиканан дакаастаан үлэлээтибит», — диэн эбэн биэрдэ.
Алексеев этэринэн, бюджет социальнай хайысхалаах буолар. Урут социальнай эйгэҕэ – доруобуйа харыстабылыгар, үөрэххэ, социальнай көмүскэлгэ уонна да атын хайысхаларга – сыллата 48-49% көрүллүбүт эбит буоллаҕына, эһиил бу суумата бүтүн бюджет аҥарын куоһаран, өссө эбиллэн иһиэн сөп.
«Бюджет аҥара социальнай эйгэҕэ туһуланар диэн балаһыанньаны мэлдьи тутуһабыт. Оннук буолуо. Хамнас үрдээбитин кэнниттэн, ороскуот аҥарыттан да ордуга буолуо дии саныыбын», — диэн Алексеев быһаарда.
Ону таһынан тыа хаһаайыстыбатыгар үп кээмэйэ бастакы ааҕыыга аҕыйах тыырыллыбытын үрдүнэн, ааспыт сыл таһымыгар хаалыаҕа. «Тыа хаһаайыстыбатыгар бастакы ааҕыы чэрчитинэн быйылгы сыллааҕар аҕыйах үбү уурбуппут үгүстэри долгутар. Бу сылын аайы ыытыллар быраактыка: бастакы ааҕыыга чопчу суума ууруллар, иккис ааҕыыга тыа хаһаайыстыбатыгар суумата эбиллэр. Быйылгы сылтан итэҕэһэ суох буолуо диэн сабаҕалыыбыт», — диэн Иван Алексеев түмүктээтэ.
Санатар буоллахха, бастакы ааҕыыга 2026 сылга уонна 2027 уонна 2028 сыллар былааннаах кэмнэригэр Саха сирин бюджетын өрөспүүбүлүкэ народнай депутаттара алтынньы 22 күнүгэр Ил Түмэн пленарнай мунньаҕар ылыммыттара. Кэлэр нэдиэлэҕэ сөбүлэһиннэрэр хамыыһыйалар былааннаннылар, онно уларытыылары дьүүллэһиэхтэрэ. Иккис ааҕыыга парламентарийдар бюджеты сэтинньи 26 күнүгэр пленарнай мунньахха көрүөхтэрэ.
