Ил Түмэн олунньу 26 күнүгэр буолбут 11-с пленарнай мунньаҕар бастакы ааҕыыга «Саха сүөһүтүн генофондатын харыстааһын уонна туһаныы туһунан» сокуоҥҥа уларытыылары киллэрэр 200-7 №-дээх сокуон барыла ылылынна, суруйда Саха сирэ саайт.
Бу уларыйыылар племенной сүөһү иитиитин эйгэтигэр федеральнай сокуоҥҥа уларытыылары киллэриини кытары сибээстээхтэр. Чуолаан, 2023 сыл атырдьах ыйын 4 күнүнээҕи сокуон «племенной сүөһү», «бонитировка» уонна «племенное свидетельство» диэн тиэрминнэри чуолкайдаата. 2023 сыл ахсынньы 25 күнүнээҕи сокуон племенной сүөһүлэри ууһатыыга сиэмэни уонна эмбриону туһаныы усулуобуйатын быһаарбыта.
Сокуон барыла генофонда туһунан сокуон 1 ыстатыйатын хаттаан көрөргө, чуолаан федеральнай сокуонунан олохтоммут саҥа өйдөбүлүн учуоттаан «бонитировка» быһаарыытын уларытарга этиллэр. Маны таһынан, «мечение» диэн өйдөбүлү суох оҥорорго былааннанар. Саҥардыллыбыт быһаарыылар СӨ сокуонун 7 уонна 12 ыстатыйаларыгар ыйыллыахтара.
Онон ити уларытыылары ылыныы федеральнай нуормаларга сөп түбэһиннэрэн, Саха сүөһүтүн генофондатын тупсарыы үлэтигэр туһуланар.
