Сороҕор лиссиэнсийэни хайа баҕарар административнай буруйу оҥоруу кэнниттэн былдьыыллар, дьиҥэр үксүгэр сааҕа арест олохтонор түбэлтэтин да көрөн туран, диэн Госдуума үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов ТАСС-ка иһитиннэрдэ.
Билигин дьокутааттар “Саа туһунан” сокуоҥҥа көннөрүү бэлэмнииллэр. Ол көннөрүү быһыытынан, административнай эппиэтинэскэ тардыллыбыт кырасданьыын сааны харайыы уонна илдьэ сылдьыы лиссиэнсийэтин аннулируйдааһын суут эрэ уурааҕынан оҥоһуллуохтаах.
«Тырааныспары ыытыыга быраабы суут уураҕынан былдьыылларын курдук, административнай эппиэтинэскэ тардыллааччылар булт саатын харайыыга, илдьэ сылдьыыга уонна туттууга лиссиэнсийэлэрин эмиэ суут уурааҕынан былдьыыра оруннаах уонна сиэрдээх даҕаны. Бу маннык көҕүлээһин бэлэмнэнэ сылдьар уонна дьокутаатВладислав Резник салайар фракциялар икки ардыларынааҕы үлэлиир бөлөх дьүүлүгэр, көрүүтүгэр ыытыллыаҕа», — диэн Нилов этэр.
Ону тэҥэ, кэмитиэт бэрэссэдээтэлэ үгүс булчуттар лиссиэнсийэлэрин суол быраабылатын кэһэн, холобура ДТП тахсыбыт сирин хаалларан барыы иһин эбэтэр бытархай күлүгээннээһин иһин -уопсастыбаннай сиргэ быдьар цензурнайа суох тылласпытын иһин былдьыыллар. Көстөрүн курдук, сааны харайыы уонна туттуу быраабылатын кытта хайдах да ситимэ суох дьайыылар. Кырасданьыыны ыстарааптаан баран сааны былдьааһын буолан тахсар диэн бэлиэтиир. Өссө Арассыыйа сорох эрэгийиэннэригэр олохтоох дьон булдунан олороллор, олохторун тутула оннук: “Бултаан-алтаан дьиэ кэргэттэрин аһылыгынан хааччыйаллар.Оттон табаһыттарга саа өссө харыстанар, көмүскэнэр функциялааҕын умнар эмиэ сатаммат”, — диэн эбии тоһоҕолоон этэр дьокутаат.
