Сменаҕа 104 пациент көрдөрөр кыахтаах поликлиниканы Кэбээйи оройуонун Сангаар бөһүөлэгэр тохсунньу бүтүүтүгэр арыйар былааннаахтар. Доруобуйа харыстабылын эбийиэктэрин тутуу уонна реконструкциялааһын хаамыытын Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников мунньаҕар дьүүллэстилэр.
Сангаарга поликлиника киириитэ Кэбээйи оройуонун уонна тулалыыр сирдэр олохтоохторугар медицинскэй көмө тиийиитин уонна хаачыстыбатын биллэрдик үрдэтиэ диэн бэлиэтэннэ.
Маны таһынан Саха сиригэр Майа сэлиэнньэтигэр балыыһа комплексын тутуу бара турар, бүгүн бэлэм буолуута 38%, ону тэҥэ Нам сэлиэнньэтигэр (быһа холоон 97%) уонна Ньурба куоракка (37% кэриҥэ) эмтиир корпустар тутуллаллар. Эбийиэктэр РФ президенэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн тутуллаллар.
Мунньахха туспа тутан тирии-венерология диспансерын дьиэтин саҥардыыны уонна Нерюнгри киин оройуоннааҕы балыыһатын улахан поликлиникатын хапытаалынай өрөмүөннээһинин көрдүлэр. Үлэ судаарыстыба баһылыгын сорудаҕынан оҥоһуллубут Нерюнгри маастар-былааныгар киирэр. Диспансер тутуутун бэлэмэ 95% кэриҥэ, поликлиниката 92% тиийдэ.
Дмитрий Садовников доруобуйа харыстабылын эбийиэктэрэ социальнай суолталаах тутуу буолалларынан, инники күөҥҥэ тутуллалларын, күүстээх хонтуруол тутуу хаачыстыбатыгар уонна болдьоҕор уурулларын эттэ.
