Сүөһү, кыыл сыстыганнаах ыарыыта турбатын, сыстыбатын уонна тарҕамматын туһугар Бэтэринээринэй сулууспа департаменын үлэһиттэрэ сыллата сыстыганнаах (инфекционнай) ыарыы 71 көрүҥүн, сыстыгана суох ыарыы 67 көрүҥүн утары быһыылары оҥороллор, эмтиир-сэтэрэр үлэ тиһигин утумнаахтык ыыталлар. Ол түмүгэр, Саха өрөспүүбүлэкэтигэр сүөһү-сылгы уонна бытархай дьиэ кыыллара сыстыганнаах ыарыыларга хаптарбыт түбэлтэлэрэ билиҥҥитэ таһаарылла илик.
Санатан эттэххэ, Россияҕа 2007-2017 сс. Африка сибиинньэтин чумаата 53 эрэгийиэҥҥэ бэлиэтэммитэ, 5 млр. солк. суумалаах хоромньу оҥоһуллубута. 2018 с. саҕаланыаҕыттан бу ыарыы 22 түбэлтэтэ көһүннэ. Бу сылга киириэхтэн ииригирии 143 түбэлтэтэ көстүбүт, оттон 2016 с. бэлиэтэммит Сибиир дьааспата билиҥҥитэ суох. Көтөр кириибэ былырыын 10 эрэгийиэҥҥэ көстүбүт буоллаҕына, быйыл этэҥҥэ. Бу туһунан Бэтэринээринэй сулууспа департаменын пресс-сулууспата иһитиннэрдэ.
Раиса Сибирякова, “Саха сирэ”, edersaas.ru
This post was published on 23.04.2018 17:51 17:51