Ил Дархан Айсен Николаев от ыйын 29 күнүттэн Мэҥэ Хаҥалас, Ньурба, Сунтаар, Нам, Уус Алдан, Хаҥалас, Томпо, Өлүөхүмэ, Өймөкөөн, Чурапчы улуустарыгар уонна Дьокуускай куоратыгар сүөһү аһылыгын бэлэмнээһиҥҥэ ыксаллаах быһыы-майгы эрэһиимин биллэрдэ. Бу туһунан СИА Ил Дархан инстаграмна суруйуутугар сигэнэн суруйар.
«Тыа сирин олохтоохторо куйаас сайын, кураан күннэр от бэлэмнээһинигэр ыарахаттары үөскэппиттэрин туһунан чаастатык этинэллэр», — диэбит Айсен Николаев.
Кини Бырабыыталыстыбаҕа туһаайан сүөһү аһылыгын бэлэмнээһиҥҥэ наадалаах бары миэрэлэри ылалларыгар, тыа хаһаайыстыбатыгар үлэлиир дьоҥҥо көмөлөһөллөрүгэр сорудахтаата.
«Кураан содулун туоруурга булгу көмөлөһүөхпүт», диэбит Ил Дархан.
