Россия рекорда: Саха сирин офтальмологтара 2 чаас 18 мүнүүтэ иһигэр 100 киһини эппэрээссийэлээтилэр

Эппэрээссийэлэр саҥа уонна эргэ саалаларга ыытылыннылар. Тэҥинэн тоҕус хирург-офтальмолог, орто уонна кыра медперсонал үлэлээтэ. Аныгы микроскоптар, стационарнай уонна портативнай фотомашиналар уонна ороскуоттуур матырыйааллар туттулуннулар. Бары пациеннарга эппэрээссийэ босхо оҥоһулунна, ОМС нөҥүө

Хаартыска: Андрей Сорокин/ЯСИА

«Бүгүн балыыһа хас күн аайы үлэлиир үлэтин оҥордо — хараҕы быыһыыр. Сороҕор биһиги хирургтарбыт күҥҥэ өссө элбэх эппэрээссийэ оҥороллор. 160 буола сылдьыбыттаах. 2025 сылга биһиги Саха сиригэр офтальномология сулууспата тэриллибитэ 100 сылын бэлиэтиэхпит. Рекорду олохтооһун – үйэлээх үлэни бэлиэтииргэ балыыһа быраастарын көҕүлээһинэ. Кэлэктиип бары бииргэ табыллан үлэлиири сатыырын уонна Саха сиригэр медицина балысханнык сайдыытын көрдөрдүлэр.  Саамай кылаабынайа, хаачыстыба мөлтөөбөт. Пациеннар бары бэлэмнээхтэр. Араас улуустартан кэлбиттэрэ. Эппэрээссийэттэн үөрэн-көтөн таҕыстылар, астыммыттар, дьоллоохтор, медицина көмөтүн кылгас болдьох иһигэр ылбыттарыттан», – диэтэ балыыһа кылаабынай бырааһа Иван Луцкан.

Үлэ хаамыытын көрө уонна түмүгү таһаара Россия рекордун кинигэтин экспертэрэ Юлия Пронина уонна Владимир Пронин Саха сиригэр кэллилэр.

«Россияҕа медицина салаатыгар рекордтар туруоруллаллар. Оһуобай болҕомтону эрэйэллэр. Катарактаны ыраастааһыны кытта сибээстээх рекорд дойдуга бастакынан ыытылынна. Биһиги хирург уустук үлэтин көрдүбүт. Миигин хас биирдии сотрудник чуолкай үлэтэ сөхтөрдө: ким тугу гынарын, киниттэн туох ирдэнэрин билэр. Пациеннар үөрэ-көтө кэлэллэр уонна бараллар, тохтобул суох. Бүгүн мин биир да форс-мажорнай балаһыанньаны көрбөтүм, оннук рекорд историятыгар баар буолааччы», – диэтэ Юлия Пронина.

Хаартыска: Андрей Сорокин/ЯСИА