Москваҕа үһүс төгүлүн уонна аан бастаан «Россия» национальнай киин былаһааккатыгар оскуола оҕолорун форума ыытыллар. Үрдүкү кылаас үөрэнээччилэрэ Уһук Илиннээҕи федеральнай уокурук кыаҕын кытта билсэллэр.
«Форум сүрүн сыала — дойду араас регионнарыттан кэлбит оскуола оҕолоругар Уһук Илин бастыҥ үрдүк үөрэх кыһаларын уонна орто анал үөрэх кыһаларын билиһиннэрии, ону тэҥэ үлэлээх буолуу, туризм, дьиэ-уот, социальнай бырагыраамалар уонна көһөр дьоҥҥо чэпчэтиилэр, бэйэ бизнеһин тэрийэн үлэлэтиигэ, бэйэ кыаҕын туһаныыга, бэйэни сайыннарар кыаҕы арыйыыга туһуланар. Оскуола оҕолорун форума «Уһук Илин регионнарын Москваҕа күннэрэ» бэстибээл чэрчитинэн тэрилиннэ”, – диэн тэрийээччилэр иһитиннэрдилэр.
Форум бастакы күнүн кыттыылаахтарынан Калуга, Ковров (Владимирскай уобалас) уонна Химки куораттан (Москуба уобалаһа) оскуола оҕолоро буоллулар. Бырагыраама дьыалабыай чааһыгар оҕолор Уһук Илин бөдөҥ үрдүк үрдүк үөрэхтэрин этиилэрин, ситиһиилээх устудьуоннар кейсэлэрин кытта билистилэр. «Видеопривет» диэн рубрикаҕа Амур гсудаарыстыбаннай университетын, Байкал судаарыстыбаннай университетын уонна М.К. Аммосов аатынан Хотугулуу-Илиҥҥи федеральнай университет устудьуоннара альма-матердарын туһунан кэпсээтилэр уонна оҕолору үөрэх кыһаларыгар киирэргэ ыҥырдылар.
Оскуола оҕолоругар Уһук Илин туристарга кэрэхсэбиллээҕин туһунан регионнарын холобурдарынан Камчатскай кыраай бэрэстэбиитэлистибэтин иһинэн үлэлиир ыччат сэбиэтин бэрэссэдээтэлэ Александр Слепцов уонна Чукотскай автономнай уокурук культураҕа уонна туризмҥа департаменын начальнигын солбуйааччы Лилия Нурова кэпсээтилэр.
Суруйааччы, аан дойду үгүс тылыгар бэчээттэнэр нуучча классическай литературатын тарҕатар графическай романнар ааптара Александр Полторак айар идэлэргэ ананар санаалаах дьоҥҥо Уһук Илини арыйар кыахтары билиһиннэрдэ. «Үөрэҕи ханна да ылбытыҥ иһин, ханна да олорорбутуҥ, үлэлээбитиҥ иһин, Уһук Илин олус кэскиллээх, бастатан туран, айар үлэҕэ», — диэн бэлиэтээтэ кини.
Оскуола оҕолорун форумун кыттыылаахтарын онлайн-викторинаҕа — бүтүн Россиятааҕы «Мой Дальний» видеоэссе куонкуруска кыттарга ыҥырдылар. Куонкурус онлайн киэбинэн ыытыллар уонна хас да түһүмэҕи киллэрэр. Кыттааччылар Уһук Илин биир регионугар босхо айанныырга кыахтаналлар. Конкурска дойду үрдүнэн 14-тэн 18-гар диэри саастаах оскуола оҕолоро уонна устудьуоннар кыттыыны ылыахтарын сөп.
Форум дьыалабыай бырагырааматын кэнниттэн айанныырга, үөрэнэргэ, үлэлииргэ, олоххо ураты кыахтары билиһиннэрэр Уһук Илин туһунан интерактивнай быыстапкаҕа экскурсия ыыттылар. Манна интэриэһинэй хас да интерактивнай зоналар уонна арт-эбийиэктэр бааллар.
«Уһук Илин регионнарын Москваҕа күннэрэ» быыстапка экспозицията «Россия» НЦ сэтинньи 1 — 30 күннэригэр, бэнидиэнньиктэн (техническэй күн) ураты, күн аайы үлэлиир. Быыстапкаҕа «Россия» национальнай киин арҕаа аанынан киириэххэ сөп: Москва куорат, Краснопресненская наб., 14, 18 стр.
«Москваҕа Уһук Илин регионнарын күннэрэ» бырайыак РФ Президенин ДФО-ҕа боломуочуйалаах бэрэстэбиитэлин, Россия Илиҥҥи Сайдыытын Министиэристибэтин, Уһук Илин уонна Арктика сайдыытын Корпорациятын уонна «Социальнай көҕүлээһиннэри сайыннарыы Фондата» коммерческайа суох тэрилтэ өйөбүлүнэн олоххо киирдэ.
