«Бырайыак бастакы икки түһүмэҕэ Аҕа Дойду Улуу сэриитигэр Кыайыы 75 сылыгар уонна 80 сылыгар анаммыта. Кинилэр чэрчилэринэн сэттэ-аҕыс уолу фроҥҥа ыыппыт ийэлэр ааттара биллэн, үйэтитилиннэ. Көрдүүр үлэҕэ өрөспүүбүлүкэ алта оройуонун бэрэстэбиитэлэ, ону тэҥэ музейдар, библиотекалар үлэһиттэрэ уонна волонтердар кытыннылар. Ол түмүгэр уолаттара төрөөбүт дойдуларын туһугар охсуспут 2299 ийэ аатын олохтуур кыахтанныбыт. Бу дьахталлар мэтириэттэрэ быйыл ыам ыйын 9 күнүгэр «Ийэ өлбөт үөстээх хорсун быһыыта» туспа холуонанан 200-тэн тахса киһи арыаллаан кыттыыны ылбыттара», — диэн Прасковья Борисова кэпсээтэ.
Кини бүгүн «Саха сирин Ийэ килбиэнэ» экспозиционнай саалаҕа Россия Саха сириттэн 12 Геройыгар аналлаах саҥа истиэндэ көрдөрүллүбүтүн бэлиэтээтэ. Бу дьаһал дьиҥнээх герой буолбут уолаттары иитэн таһаарбыт ийэлэр тустарынан кэпсиир аналлаах.
«Бу истиэндэ — Россия герой-ийэлэригэр ытыктабылбыт. Кинилэр олохторо дьиэ кэргэҥҥэ, оҕону иитиигэ анаммыт дьахталлар. Үгүстэрэ улахан ыалга төрөөн, иитиллэн, кэлин бэйэлэрэ элбэх оҕолоох ыал буолбуттар. Анал байыаннай дьайыы зонатыгар хорсун быһыыны-майгыны оҥорбут уолаттарыгар кинилэр биир сомоҕо санааны, хардарыта көмөлөһүүнү уонна дойдуга муҥура суох тапталы тиэрдибиттэрэ», — диэн Борисова тоһоҕолоон бэлиэтээтэ.
Истиэндэ презентациятыгар Таатта оройуонуттан Россия Геройа Родимир Максимов ийэтэ Варвара Максимова кытынна.
«Ардыгар Россия Геройун хайдах иитэн таһаарбыккын диэн ыйыталаһаллар, ону хаһан да герой быһыытынан иитэн таһаарбатаҕым диэн хоруйдуубун. Бары ийэлэр курдук, киниэхэ төрөөбүт дойдуга тапталы иитэр этим, бары саҕалааһыҥҥа өйүүр этим. Кини бэйэтинэн фроҥҥа барыан баҕарбытыгар, биһиги эмиэ өйөөбүппүт, саамай кылаабынайа — тыыннаах, чэгиэн-чэбдик төннүө диэн эрэнэр, итэҕэйэр этибит. Чэгиэн-чэбдик төннөрүн күүппүтүм, билигин кини биһигини кытта бииргэ, тыыннаах, дьылҕабар махтанабын. Бу ийэҕэ сүрүн дьол», — диэн Варвара Максимова үллэһиннэ.
Кини уола бу бочуоттаах ааты олоҕун устата дьоһуннаахтык илдьэ сылдьарыгар эрэлин биллэрдэ.
