«Ыччат билиэхтээх дии саныыбыт: Россияҕа элбэх буойун баар, инники кирбиигэ киирсэ сылдьан, дойду интэриэһин туруулаһар. Элбэх ыччат баҕа өттүлэринэн бараллар, анал байыаннай дьайыыга. Биһиги эмиэ улахаттар холобурдарыгар улааппыппыт, бэтэрээннэр историяларын истибиппит, бу барыта биһиги олохпутугар улахан оруоллаах», — диэтэ Александр Колесов.
Тэрээһиҥҥэ бэстибээл 125 кыттааччыта 21 улуустан баар.
Мария Цыренова Уус-Ньараттан кэлбит. «Муус Устарга» кыттыбыта иккис сыла. «Страйкболга биһиги хамаандабыт алта киһилээх — икки ытааччы, икки медик, икки пилота суох аппарааты үлэлэтээччи. Бэҕэһээ инструктаж аахпыттара, тактическай медицинаҕа теория буолбута. Саҥаны уонна интэриэһинэйи элбэҕи биллибит. Бүгүн Россия Геройдарын кытта көрсүһүү олус суолталаах. Элбэҕи биллибит, бу уопуппутуттан атыттарга үллэстиэхпит», — диэтэ кини.
«Север» кулууп салайааччыта Александр Шпак Өймөкөөнтөн кыттар. Тэрилтэ пилота суох көтөр аппарааттарынан дьарыктанар, СВО байыастарыгар көмөлөһөр. «Ый анараа өттүгэр пилота суох көтөр аппарааттары ылбыппыт, тренировкалары ыытабыт. Бэстибээлгэ кэллибит, уопут ылаары. Россия Геройдарын кытта көрсүһүүнү күүппүтүм», — диэтэ кини.
