Госдумаҕа оҕо ахсааныттан көрөн төрөппүттэр биэнсийэҕэ тахсар саастарын аччатарга этии киллэрдилэр. Суругу РФ үлэҕэ министиэристибэтигэр «Сиэрдээх Арассыыйа — Кырдьык иһин» баартыйа бэрэссэдээтэлэ Сергей Миронов уонна фракция салайааччытын бастакы солбуйааччы Яна Лантратова ыыттылар, ТАСС суруйар.
Билигин элбэх оҕолоох ийэлэр бочуоттаах сынньалаҥҥа эрдэ тахсыахтарын сөп, ол гынан баран, ол туһугар тустаах ыстааһы оҥорон, биэнсийэ бааллары мунньуохха наада, оттон саҥа көҕүлээһин «судургу, сиэрдээх уонна дьоҥҥо өйдөнөр» диэн сурук ааптардара ааҕаллар.
Биэнсийэҕэ тахсыы сааһын икки оҕоҕо биир сылга, үс оҕоҕо үс сылга, түөрт уонна онтон тахса оҕоҕо биэс сылга намтатарга этэллэр. Депутаттар бэлиэтииллэринэн, көҕүлээһин төрөөһүнү элбэтиэ, социальнай сиэрдээх буолууну өрө тутуо, ыал харысхалын таһымын улаатыннарыа.
Санатан эттэххэ, хоту дойду олохтоохторо олохтоммут биэнсийэ сааһыттан биэс сыл эрдэ биэнсийэҕэ тахсар бырааптаахтар, ол айылҕа — килиимэт тыйыс усулуобуйатыгар олох, үлэ уратытынан сибээстээх. 2025 сылга бу кыаҕынан Саха сирин 2,5 тыһыынчаттан тахса олохтооҕо туһаммыта.
