“Рослесозащита” Саха сиринээҕи тыаны харыстааһын уонна судаарыстыбаннай ойуур-патологическай кэтээн көрүүгэ салаатын исписэлиистэрэ 2026 сылга үлэ барыллаан былаанын ылыннылар. Киэҥ далааһыннаах үлэ Саха сирин 10 лесничествотын сирин хабыаҕа.
Саҥа сезоҥҥа буортулаах организмнары учуоттааһыны 50 тыһыынча гектар сиргэ ыытыахтара. Сүрүн болҕомто сибиир шелкопрядыгар ууруллуоҕа: Мэҥэ Хаҥалас лесничествота — 5636 га, Нам лесничествота — 11 461 га, Таатта лесничествота — 11 396 га,Чурапчы лесничествота — 21 507 га.
Бастайааннай кэтээн көрөр пууннарга мониторинг Хаҥалас, Нам улуустарыгар уонна Дьокуускай лесничествотыгар 5,4 мөл.гектартан тахса иэннээх сиргэ былааннанна.
Талан сири кэтээн көрүүлэр 27 200 гааны хабаллар: 19 895 га — сибиир шелкопрядынан (Амма, Нам, Хаҥалас лесничестволара) уонна тиит сиэрэй листовертката буортулаабытын кэннэ чинчийии (Ньурба, Үөһээ Бүлүү лесничестволара); 7200 га — ойуур баһаарын содулун сыаналааһын (Горнай лесничествота); 105 га — санитарнай-чэбдигирдэр дьаһаллар кэннилэриттэн хонтуруоллааһын (Горнай лесничествота).
Талан кэтээн көрүү аҕыс лесничествоҕа 31 маршрутунан ыытыллыаҕа. Сибиир шелкопрядыгар сайыҥҥы кэмҥэ 10 бастайааннай маршрутка кыра мэһэйдээх хабыылары туруоруохтара. Өссө 11 рекогносцированнай маршрут шелкопряд, даурскай тиит чехлоноска уонна уһун короед көстөр кыахтаах сирдэригэр чинчийэллэр.
Бэриллибит былаан барыллааһын буолар, хонуу сезонугар бэлэмнэнии процеһыгар кыра көннөрүүлэр, чуолкайдааһыннар киириэхтэрэ. Сыллааҕы кэтээн көрүүлэр кутталлаах буортулаахтар ахсааннарын динамикатын кэтээн көрөргө, үөн ыспыт сирдэрин кэмигэр быһаарарга уонна ойуур баһаарын содулун сыаналыырга кыах биэрэллэр. Ылыллыбыт дааннайдар региоҥҥа тыаны харыстыыр дьаһаллары былааннааһыҥҥа тирэх буолаллар.
