Якутскгеология исписэлиистэрэ 2025 сыллаахха Томпо оройуонугар учаастакка чох саппааһын сыаналааһын бастакы түһүмэҕинэн «Геология: возрождение легенды» федеральнай бырайыак чэрчитинэн хонуу үлэтин наадалаах кээмэйин толордулар — Росгеологияҕа иһитиннэрдилэр.
«Билигин камеральнай уонна лабораторнай үлэлэр бара тураллар, ол түмүгүнэн 2026 сыллааҕы сааскы-сайыҥҥы хонуу сезонугар сири үүттүүр үлэ былааннара көннөрүллүөхтэрэ», — дииллэр.
Чоҕу сыаналыыр үлэлэр Аллараа-Алдан (Хаандыга) чох баайдаах оройуонугар Тыры — Хаандыга үрэхтэр икки ардыларыгар ыытыллаллар. Бу учаастак урут 80-тан тахса сыл сайда турар Дьабарыкы-Хайа сир хотугу салаатынан буолар. Геологтарга 55 мөл.туонна кээмэйдээх Д маркалаах чоҕу сыаналыырга, ону тэҥэ хостооһун аһаҕас ньымата кыаллар сирдэрин буларга сорук турар.
«Биһиги урут булуллубут сир баайын көстүүлэрин үөрэтэн, саппаас кээмэйин уонна сайдыы экономическай туһалааҕын быһаарыахтаахпыт. Саха сиригэр өрөспүүбүлүкэ киин уонна хотугу улуустарын хаачыстыбалаах уматыгынан хааччыйарга энергетическэй таас чох минеральнай-сырьевой базатын улаатыннарыы боппуруоһа олус тирээн турар. Ордук аһаҕас ньыманан үлэлииргэ сөптөөх учаастактар, бу биһиги чинчийэр эбийиэкпит буолар», — диэн кэпсээтэ Дьокуускай геологиятын управляющай дириэктэрэ Роман Данилов.
«Биһиги үлэлэрбит учаастактара Томпо оройуонун уонна өрөспүүбүлүкэни чоҕунан хааччыйыыга улахан оруоллаах. Маны таһынан биһиги сорукпут таас чохторго аргыстаах компоненнары уонна бииргэ үлэлиир сиртэн хостонор боруодалары — туойу, кумаҕы, кумаҕы-гравийы, умайар сиртэн хостонор баайы (таас чоҕу, торфу) уо.д. а. хостоон таһаарар сорукпут», — диэн Саха сирин ведущай геолога, эбийиэккэ эппиэттээх толорооччу Галина Эверстова быһаарда.
