От ыйын саҕаланыытыгар Роман Дмитриев туһунан киинэни биллиилээх тустуук төрөөбүт Эдьигээн улууһун Бэстээх нэһилиэгиттэн саҕаланна. Ол туһунан “Эдьигээн сонуннара” хаһыат кылаабынай эрэдээктэрэ Мария Аполлонова хаһыат саайтыгар таһаарда.
Быйыл кулун тутар 7 күнүгэр сахалартан бастакы Олимпийскай чемпион, ССРС спордун үтүөлээх маастара, Сэбиэскэй Сойуус Союз уонна Арассыыйа Федерациятын үтүөлээх тренерэ Роман Михайлович Дмитриев төрөөбүтэ 75 сылын өрөспүүбүлүкэ уопсастыбаннаһа киэҥник бэлиэтээбитэ. Дьокуускай куоракка Суорун Омоллоон аатынан Опера уонна балет тыйаатырыгар киэҥ ыҥырыылаах мунньах буолан ааспыта. Бу күн Роман Дмитриев олоҕун, үлэтин, спортка ситиһиилэрин кэрэһэлиир уус-уран киинэ уһулларын туһунан иһитиннэрбиттэрэ. Киинэ туруорааччы-режиссёрунан РФ искусстволарын үтүөлээх деятелэ Никита Аржаков анаммыта. Тэрээһиҥҥэ СӨ Бырабыыталыстыбатын бэрэссэдээтэлэ Кирилл Бычков уонна режиссер Никита Аржаков, үгэс быһыытынан, тэриэлкэни штативка охсон алдьаппыттара.
СӨ Ил Дархана Айсен Николаев Роман Михайлович Дмитриев аатын үйэтитэр дьаһалларга илии баттаабыта уонна Бырабыыталыстыбаҕа сорудах биэрбитэ. Ол дьаһаллар чэрчилэринэн Роман Дмитриев туһунан киинэ уһуллуута олоххо киирбитэ. Быйыл муус устар ыйга Никита Аржаков салайааччылаах устар бөлөх Эдьигээн улууһугар кэлэ сылдьыбыта уонна улуус баһылыгын Сорокин В.Н. уонна нэһилиэнньэни кытта көрсүбүтэ. Бу түгэҥҥэ киинэ устуутун хаамыытын, миэстэтин, артыыстары, массовканы сүүмэрдээһин туһунан кэпсэтии барбыта. От ыйын 1 күнүттэн Роман Дмитриев туһунан уус-уран киинэни устуу Эдьигээн оройуонун Бэстээх нэһилиэгиттэн саҕаланна. Киинэ уһуллуутун үөрүүлээх арыллыытыгар Бэстээх нэһилиэгин олохтоохторо тоҕуоруһа муһуннулар. Бу күн нэһилиэк баһылыга Петр Афанасьев уонна киинэ уус-уран режиссера Никита Аржаков эҕэрдэ тыл эттилэр.
-Биһиги 7 киһилээх устар бөлөхпүт Эдьигээн оройуонун Бэстээх нэһилиэгэр бэс ыйын 23 күнүгэр кэлбитэ. Киинэбитин устуу Улуу спортсмен төрөөбүт дойдутуттан – Бэстээхтэн саҕаламмыта улахан суолталаах диэн бэлиэтиибин. Сахатын сирин аар саарга аатырдыбыт чулуу спортсмен Роман Дмитриев олоҕун, үлэтин, олоххо көрүүтүн, спортка ситиһиитин, дьулуурун, тулуурун, күүстээх санаатын, муудараһын киэҥ эйгэҕэ, кэнэҕэски ыччакка тиэрдии, холобур оҥоруу киинэ сүрүн сыалынан-соругунан буолар. Киинэбит СӨ Бырабыыталыстыбатын тус сакааһынан сыл устата уһуллара, таҥыллара былааннанар. Бэстээххэ Роман оҕо эрдэҕинээҕитин Алик Анисимов, убайын Ганяны — Вениамин Гаврильев, ийэтин-аҕатын Мария Кангалассова уонна Владимир Иванов – Боото, доҕотторун Эльдар Афанасьев, Слава Самсонов толоруохтара, нэһилиэк олохтоохторо массовкаҕа кыттыахтара. Бэстээххэ уһуллуулар Арамаан кэрэ айылҕалаах, көрсүө-сэмэй, үлэһит дьонноох төрөөбүт дойдутун көрдөрүөхтэрэ, оҕо сааһыттан чемпион буолар майгыта-сигилитэ, этэ-хаана хатарыллан тахсыбытын арыйар хартыыналар киинэ биир сүрүн түгэнинэн буолуохтара. Киинэҕэ Арамаан эдэр сааһын, Олимпийскай пьедесталга тахсыытын, саха норуота киэн туттуута буолуутун Эдьигээн нэһилиэгин ыччата Прокопий Николаев оонньуохтаах. Киинэбитин Бэстээххэ, Чурапчыга уонна Москва куоракка устар былааннаахпыт. Онтон салгыы өссө көстөн иһиэҕэ, уларыйыылар да тахсыахтарын сөп. Бэстээххэ от ыйын ортотугар дылы үлэлиир былааннаахпыт. Биһиэхэ Бэстээх нэһилиэгин «Сарыал» сынньалаҥ киинин үлэһиттэрэ уонна “Со Бэе film” общественнай тэриллии күүс-көмө буолаллар, — диэн кэпсээтэ режиссер Никита Аржаков, суруйда Саха парламент саайта.
