Тохсунньу 16-17 күннэригэр Өймөкөөн оройуонугар буолар «Тымныы Полюһа – Өймөкөөн» VII марафоҥҥа рекорд олохтуур ахсааннаах спортсмен кыттыаҕа. Регистрацияны Арассыыйа 44 регионун, ону таһынан Беларусь уонна Япония 96 бэрэстэбиитэлэ ааста.
Марафон кыттыылаахтарын ортотугар Россия футболга сүүмэрдэммит хамаандатын экс-хапытаана Алексей Смертин баар, кини ультрамарафону 50 биэрэстэҕэ сүүрүөҕэ. «»Тымныы Полюһа – Өймөкөөн» кыһыҥҥы сүүрүүгэ диэри хас күн хаалбытын ааҕабын. 2026 сыл тохсунньу 16-17 күннэрэ: 50 сааспар 50 км ырааҕы – 50 кыраадыс тымныыга», — диэн бэлиэтээтэ.
Тэрээһин Томтор уонна Өймөкөөн сэлиэнньэлэр икки ардыларыгар трассаҕа ыытыллыаҕа. Кылгас дистанцияларга сүүрүүлэр буолуохтара — 5, 10, 15 килэмиэтир уонна 21,1 км, ону тэҥэ уһун — 42,2 уонна 50 км. Трассаҕа атлеттарга аналлаах сылаас балааккалар туруохтара. Экстремаллары медиктэр уонна ЫБММ үлэһиттэрэ арыаллыахтара. Быйыл тэрийээччилэр Россия рекордун Кинигэтигэр марафону официальнайдык бэлиэтиир былааннаахтар.
«Тымныы Полюһа» VII марафон быйыл геолог, географ, бастакы арыйааччы, ССРС наукаларын Академиятын анал кэрэспэдьиэнэ Сергей Обручев кыттыбыт “Индигир экспедициятын 100 сылыгар” ананар.
