Саха сиригэр 2025 сылга өрөспүүбүлүкэ баһылыгын стратегическай ыйаахтарын олоххо киллэрии чэрчитинэн «Үлэлиир Саха Сирэ. Көҕүлээһин» бырайыак стартыыр. Бу туһунан «Актуальнай интервью» тэлэбиидэнньэ эфиригэр дьарыктаах буолуу киинин салайааччыта Светлана Горюшинская иһитиннэрдэ.
Кини региоҥҥа 2024 сыллаахха пилотнай эрэһиимҥэ «Тыа сирин дьахтара. Үлэлиир кэм» бырайыак үлэлээбитин эттэ.
«Былырыын бырайыакка аҕыс тыа хаһаайыстыбатын оройуона кытынна, онно дьахтар кулууптара тэрилиннэ. Дьаһалы олоххо киллэрии кэмигэр туруорбут былааммыт икки төгүл аһара туолла. Аҕыс оройуоҥҥа 600-тэн тахса дьахтары үлэнэн хааччыйбыппыт», — диэтэ Светлана Горюшинская.
2024 сылга «Дьахтар кулууптарын» үлэтэ биллэр-көстөр түмүктэри аҕалла: 461 дьахтар үлэҕэ киирдэ, оттон 157 дьахтар бизнеһин арыйда. Ону таһынан 63 дьахтар квалификацияларын үрдэтиигэ уонна кыахтарын кэҥэтиигэ идэҕэ үөрэҕи аастылар.
Пилотнай бырайыак үтүө уопутун учуоттаан, «Үлэлиир Саха Сирэ. Көҕүлээһин» 2025 сылтан Саха сирин бары оройуоннарын хабар.
Саха Сирин дьарыктаах буолуу кэмитиэтин салайааччыта этэринэн, саҥа бырайыак дьахталларга үлэлээх-хамнастаах, бэйэлэрин дьыалаларын арыйыыга көмөлөһүүгэ эрэ буолбакка, психологическай өйөбүлгэ, тус сайдыытыгар уонна итинэн дьиэ кэргэттэрин олоҕун хаачыстыбатын, чэгиэн-чэбдик буолуутун тупсарыыга туһуланар.
«Холобур, кыттааччыларбытыгар предпринимательскай үлэ төрүтүнэн курстары, араас маастар-кылаастарга, тренингтарга кыттыыны ылалларыгар этии киллэрэбит. Былырыын 157 дьахтар маннык үөрэҕи ылбыта, билигин кинилэр тыа сиригэр саҥа үөрэхтэрин олоххо киллэрэн эбии дохуот ылаллар», – диэн кэпсээтэ Светлана Горюшинская.
Санатан эттэххэ, Россия президенэ Владимир Путин көҕүлээбит «Кадрдар» национальнай бырайыак чэрчитинэн Саха сиригэр үлэтэ суох дьоҥҥо уонна гражданнар сорох категорияларыгар ирдэниллэр 89 бырагырааманан босхо үөрэтии тэрилиннэ. Кэлиҥҥи сылларга экономикаҕа дьарыктаахтар ахсааннара 30 тыһыынчаттан тахса киһинэн улаатта, оттон үлэтэ суох дьон ахсаана 10 тыһыынча гражданынан аҕыйаабыт.
