Өрөспүүбүлүкэҕэ айылҕа баайын хостуур салаа ситиһиилэрин, инники соруктарын, эрэгийиэни сайыннарарга социальнай эппиэтинэстэрин дьүүллэһэр Ил Түмэн түөрт сис кэмитиэтин кыттыгас кэҥэтиллибит мунньаҕар СӨ Бырабыыталыстыбатын бэрэссэдээтэлин бастакы солбуйааччыта Дьулустаан Борисов күн бүгүн бүддьүөккэ сүрүн дохуоту алмаас буолбакка, кыһыл көмүс киллэрэрин туһунан эттэ, суруйда Саха парламент саайт.
«Өрөспүүбүлүкэ экэниэмикэтин эрэнэр эркинэ, туллар тутааҕа, бүддьүөтү толорооччу — айылҕа баайын хостуур бырамыысыланнас хампаанньалара.
Урут алмааһы хостуур салаа бүддьүөтү хааччыйар этэ, билигин сааҥсыйа кэмигэр аан дойдуга алмааска, бирилийээҥҥэ наадыйыы түстэ, ол иһин бу салааттан дохуоппут 12% киирэр, ити 29 млрд. солк.
Көмүһү хостуур хампаанньалар бүддьүөккэ 48 млрд. солк. киллэрэн, дохуоппут 20% хааччыйдылар. Ньиэп-гаас салаата 26 млрд. солк. биэрэн, дохуот 11%, аан дойдуга таас чох сыаната кыра буолан, 5,6 млрд. солк. киллэрэн, олохтоох бүддьүөт дохуотун 2,3% хааччыйар», — диэн бэлиэтээтэ Дьулустаан Борисов.
Кини оробуочай бөлөх тэриллэн, онно инвестордар, бары министиэристибэлэр, норуот дьокутааттара, улуус, уопсастыбаннас бэрэстэбиитэллэрэ киирэн, сытыы боппуруостары дьүүллэһиэхтээхтэрин туһунан эттэ. Онно экология эрэ буолбакка, каадырынан хааччыллыы, олохтоох бэдирээччиттэри үлэҕэ ылыы барыта быһаарыллыаҕа.
