Российскай Федерация Президенэ Владимир Путин «Азия оҕолоро» VIII сайыҥҥы норуоттар ардыларынааҕы спортивнай оонньуулар кыттыылаахтарыгар уонна ыалдьыттарга эҕэрдэтин тириэртэ.
«Эһиги үгэскэ кубулуйбут күрэхтэһиилэргит куруук үрдүк тэрээһиннээхтик уонна айар таһымҥа бараллар, оҕо спордун сайдыытыгар биллэр кылааты киллэрэллэр, олимпийскай хамсааһын идеятын тарҕаталлар, араас дойдулар норуоттарын доҕордоһууларын тэрийэллэр. Быйыл «Азия оҕолорун» Дьокуускай иһирэхтик көрсөр. Саха Өрөспүүбүлүкэтин киин куората маннык таһымнаах күрэхтэһиилэри ыытыыга дириҥ уопуттаах. Уонна, биллэн турар, оҕолор үчүгэйдик сынньаныахтара, Уһук Илиҥҥи биир ураты историялаах, кэрэ көстүүлээх айылҕалаах регионун мааны сирдэрин билсиэхтэрэ. Оонньуулар спортсменнарга, ыалдьыттарга, олохтоохторго улахан бырааһынньык буоларыгар эрэнэбин, кыраһыабай, кырдьыктаах киирсиилэр, чаҕылхай кыайыылар, саҥа рекордтар умнуллубаттык өйгө хаалыахтара. Эһиэхэ баҕарабын ситтиһиини, интэриэһинэй көрсүһүүлэри, умнуллубат өйдөбүллэри», — диэн суруллар судаарыстыба баһылыгын эҕэрдэ суругар.
