Петербудааҕы норуоттар икки ардыларынааҕы экэнэмиичэскэй пуорумҥа Ил Дархан Айсен Николаев Сир баайын туһаныыга федеральнай ааҕыныстыба салайааччытын Евгений Петрову кытта көрүстэ. Көрсүһүүгэ СӨ Бырабыыталыстыбатын бэрэссэдээтэлэ Кирилл Бычков уонна бастакы солбуйааччы Джулустан Борисов кытыннылар диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр, суруйар Саха сирэ саайт.
Көрсүһүү биир сүрүн тиэмэтинэн Уһук Илиҥҥи федеральнай уокурукка сири геологическай үөрэтии бырагырааматын билиҥҥи статуһун туһунан буолла. Ил Дархан былырыын кулун тутарга Саха сирин минеральнай-сырьевой баазаны үүннэрэр пилотнай эрэгийиэнинэн быһаарар туһунан этии киллэрбитэ.
«Этиини РФ Бэрэсидьиэнэ Владимир Путин өйөөбүтэ. ВЭФ түмүгүнэн туспа бырагыраама толкуйдаан, федеральнай бырайыакка киллэрэр туһунан сорудахтаммыта. Сир баайдаах саҥа сирдэри арыйыы инвестордары аҕалыаҕа, өрөспүүбүлүкэ бүддьүөтэ элбииригэр дьайыаҕа, итиэннэ үлэ миэстэтэ арыллыаҕа, өрөспүүбүлүкэ социальнай-экэнэмиичэскэй сайдыыта түргэтиэҕэ», — диэн Айсен Николаев көрсүһүү түмүгэр бэлиэтээтэ.
