ХXII өрөспүүбүлүкэтээҕи «Аҕа күрэҕэр» Таатта улууһун олохтоохторо Петр уонна Арсений Чупровтар муҥутуур кыайыылаах буоллулар. Кинилэргэ Ил Дархан Айсен Николаев квадроцикл бирииһин туттардылар.
Иккис уонна үһүс миэстэлэри Яков уонна Михаил Кривошапкиннар Чурапчы улууһуттан, Александр уонна Арсений Винокуровтар Дьокуускайтан буоллулар, туһааннааҕынан.
Петр Чупров ОДьКХ сварщик, Дьүлэй нэһилиэгин депутата, «Дохсун» эр дьон ансаамбылын салайааччыта. Улахан уолун Айыллаанныын 2015 уонна 2016 сылларга «Аҕа күрэҕэр» бастаабыттара. Орто уола Арсенийдыын ааспыт сылга иккистээбиттэрэ, быйыл бастаатылар. Кыралара Айхал ийэлэрэ Сардана Васильевналыын Сылаҥҥа дьонноругар өйөбүл буола кэлбиттэр.
Чупровтар, күрэхтэһии атын кыттыылаахтарын курдук, уолаттарын кыра саастарыттан үлэҕэ, бултааһыҥҥа, балыктааһыҥҥа сыһыараллар. Петр Романович кэпсээбитинэн, кинилэр сылгы баазалаахтар, уолаттар сайынын оттууллар, пилорамаҕа үлэлииллэр.
Кривошапкиннар матассыыкыл, Винокуровтар Чурапчы улууһун баһылыгын бирииһин — убаһаны — туттулар. Атын кыттааччылар эмиэ спонсордартан, тэрийээччилэртэн бэлэх ыллылар.
