Бэҕэһээ, аан дойдутааҕы аҕам саастаахтар күннэригэр, Нам улууһун Ленскэй нэһилиэк баһылыга Петр Сокольников Т.К. Ядрихинская аатынан өрөспүүбүлүкэтээҕи кырдьаҕастар уонна инбэлииттэр интернат-дьиэлэригэр ыалдьыттаата.
Аҕам саастаах интернат олохтоохторугар баһылык Петр Сокольников эҕэрдэтин, баҕа санаатын тириэртэ. Ленскэй нэһилиэк олохтоох дьаһалтатын кытта П.П. Ядрихинскай-Бэдьээлэ аатынан Намнааҕы Олоҥхо дьиэтэ эҕэрдэҕэ кыттыста. Олоҥхо дьиэтин үлэһиттэрэ Владимир Сыромятников, Руслан Павлов ырыа ыллааннар аҕам саастаахтары сэргэхситтилэр.
Хаартыска: Харысхан Попов
“Олоххо элбэххэ үөрэнэр, холобур оҥостор дьоммут – аҕам саастаахтар бэлиэ күннэрэ! Убаастабыллаах аҕам саастаах дьоммут бүгүҥҥү күҥҥэ кырдьары билиммэккэ бары эйгэҕэ бэйэлэринэн кыттыыны ылаллара улахан холобурунан буолар. Ол курдук, спорт, култуура, айар кут хайысхаларыгар ситиһиилэринэн үөрдэллэр. Манан эрэ муҥурдаммакка, үгүстэр үтүө аахсыйаларга кыттыыны ылалларын, айары-тутары өрө туталларын көрөммүт сөҕөбүт-махтайабыт, киэн туттабыт! Көлүөнэттэн көлүөнэҕэ бэриллэн кэлбит үтүө үгэстэри кэлэр көлүөнэҕэ хаалларааччы, үөрэтээччи, үллэстээччи аҕам саастаах дьоммутугар доруобуйаны баҕарабын!” – диэн эҕэрдэ бастыҥын аныыр баһылык Петр Григорьевич.
Ааптар: Харысхан Попов, Нам улууһа
