«Педагогика» салааҕа орто профессиональнай үөрэхтээһиҥҥэ үөрэх кластера Гоголев аатынан Дьокуускайдааҕы педагогическай колледж базатыгар аһылынна. Бырайыак выпускниктары үлэнэн хааччыйыыга 75% ситиһиини көрдөрөр.
«Кластернай сыһыаны олоххо киллэриигэ Бүлүү уонна Нам оройуоннарыгар баар атын педагогическай колледжтарбыт кытталлар. Оскуолаларга, оҕо саадтарыгар, эбии үөрэх тэрилтэлэригэр баар үлэ биэрээччилэрбит эмиэ кытталлар. Кадрдары бэлэмнээһин тэрилтэлэр, чуолаан, биһиги сакаасчыттарбыт сакаастарынан ыытыллар. Онон биһиги устудьуоннарбыт аны үрдүкү куурустарга оскуола чэрчитинэн профессиональнай бэлэмнэниини ылар кыахтаахтар. Быйыл федеральнай структуралар өйөбүллэрин ылбыппыт, педагогическай колледжтары бүтэрээччилэр икки идэттэн итэҕэһэ суох ылыахтаахтар. Холобур, Быйыл Дьокуускайдааҕы педагогическай колледж салайааччылара Владивосток куоракка оскуола оҕолорун кытта лааҕырга сынньана сырыттылар, онтон кэлэр сылтан Чернай муора кытылыгар лааҕырга производственнай практиканы ааһар кыах үөскүөҕэ», — диэн кэпсээтэ Саха сирин үөрэҕин уонна наукатын миниистирэ Нюргуна Соколова.
Үөрэх кластерын үлэтин тэрийиигэ биир туспа комплекс быһаарылынна. Үөрэх корпуһа үлэтин көрүҥүнэн тоҕус зонаҕа арахсар.
1 № -дээх үөрэх корпуһугар лабораториялар саҥардылыннылар, аудиториялар саҥа оборудованиеларынан хааччылыннылар, ону тэҥэ саҥа мастарыскыайдар тэрилиннилэр.
Санатан эттэххэ, «Профессионалитет» федеральнай бырайыак Владимир Путин быһаарыытынан «Үөрэхтээһин» национальнай бырайыак чэрчитинэн олоххо киирэр уонна орто профессиональнай үөрэхтээһин тиһигэр региональнай экономика тирээн турар суолталаах наадыйыыларыгар сөп түбэһиннэрэн квалификациялаах кадрдары бэлэмниир саҥа моделы тэрийиигэ туһуланар.
Эрдэ ЯСИА орто сүһүөх медиктэри бэлэмниир кластер Саха сиригэр 2026 сылга аһыллыа диэн иһитиннэрбитэ.
